సిటీ బ్యాంకు కీలక నిర్ణయం, రిటైల్ వ్యాపారం విక్రయం: ఉద్యోగులు, ఖాతాదారులకు ఇబ్బందులుండవ్

సిటీ బ్యాంకు కీలక నిర్ణయం తీసుకుంది. భారత్ సహా 13 దేశాల్లో రిటైల్ వ్యాపారం నుండి బయటకు వచ్చేందుకు అమెరికాకు చెందిన ఈ బ్యాంకింగ్ దిగ్గజం ప్రణాళికలు సిద్ధం చేస్తోంది. ఈ రిటైల్ బిజినెస్‌ను విక్రయించేందుకు సరైన కొనుగోలుదారు కోసం చూస్తోంది. వినియోగదారు వ్యాపారం నుండి బయటకు వచ్చిన తర్వాత పూర్తిగా కార్పోరేట్ వ్యాపారం పైన దృష్టి సారించి ఈ విభాగంలో విస్తరించేందుకు పెట్టుబడులు పెట్టాలని భావిస్తోంది.

అనుమతులు రాగానే విక్రయం

నియంత్రణ అనుమతులు రాగానే బ్యాంకు రిటైల్ వ్యాపారం విక్రయం పూర్తి చేస్తామని సిటీ బ్యాంకు ఇండియా సీవో తెలిపారు. ఈ బ్యాంక్‌కు దేశంలో 35 శాఖలు ఉన్నాయి. సిటీ కన్స్యూమర్ బ్యాంకింగ్ విభాగంలో దాదాపు 4,000 మంది ఉద్యోగులు ఉన్నారు. మొత్తం 19వేల మంది ఉద్యోగులు ఉన్నారు. సిటీ బ్యాంకుకు 29 లక్షల మంది రిటైల్ ఖాతాదారులు ఉన్నారు. 12 లక్షల బ్యాంకు అకౌంట్లు, 22 లక్షల క్రెడిట్ కార్డు అకౌంట్స్ ఉన్నాయి. భారత్ సహా 13 దేశాల్లో కన్స్యూమర్ బ్యాంకింగ్ నుండి వైదొలుగుతున్నట్లు సిటీ బ్యాంక్ గ్లోబల్ సీఈఓ గురువారం వెల్లడించారు.

అప్పటి వరకు సేవలు

మార్కెట్లలో తమ బ్యాంక్ ఇతర సంస్థలతో పడలేకపోవడం ఇందుకు కారణమని స్పష్టం చేశారు. సిటీ బ్యాంక్ ఈ వ్యాపారం నుండి ఎలా వైదొలగనుందనే అంశంపై మరింత స్పష్టత రావాల్సి ఉంది. అంతేకాదు, భారత్‌లో ఈ వ్యాపారం నుండి వైదొలిగేందుకు ఆర్బీఐ ఆమోదం అవసరం. అప్పటివరకు తమ కస్టమర్లకు యధావిధిగా సేవలు అందించనుంది.

ఎన్నో ఏళ్లుగా సేవలు

బయ్యర్స్ కోసం ప్రయత్నాలు చేస్తున్నామని, ఈ సేల్ వల్ల ఇప్పటికే ఉన్న కస్టమర్లపై ఎలాంటి ప్రభావం ఉండదని సిటీ బ్యాంకు తన ప్రకటనలో తెలిపింది. 1902లో భారత మార్కెట్లోకి ప్రవేశించిన సిటీబ్యాంకు 1985లో కన్స్యూమర్ బ్యాంకింగ్ సేవలను ప్రారంభించింది.