క్రిప్టో కరెన్సీపై పన్ను, వచ్చే ఆర్థిక సంవత్సరంలో చట్టబద్దత!

క్రిప్టో కరెన్సీని పన్ను పరిధిలోకి తీసుకు వచ్చేందుకు కేంద్ర ప్రభుత్వం సన్నద్ధమవుతోంది. ఈ డిజిటల్ కరెన్సీ లాభాల పైన పన్ను వేసేలా ఆదాయపు పన్ను చట్టంలో మార్పులు చేయాలని భావిస్తోంది. 2022-23 ఆర్థిక సంవత్సరానికి గాను పార్లమెంటులో ప్రవేశపెట్టే బడ్జెట్ సందర్భంగా సవరణలను ప్రతిపాదించాలని కేంద్రం భావిస్తోందని తెలుస్తోంది.

ఇప్పటికే కొంతమంది క్రిప్టోపై ద్వారా వచ్చే ఆదాయం పైన మూలధన లాభాల పన్ను చెల్లిస్తున్నారని చెబుతున్నారు. క్రిప్టోను ఒక ఆస్తిగా భావిస్తున్న వారు చాలామంది ఉన్నారు. అయితే జీఎస్టీ చట్టంలో మార్పులు చేయాల్సిన అవసరం ఉండకపోవచ్చునని అంటున్నారు.

జీఎస్టీలో ఇతర సేవలు అన్న అంశం ఉందని, వాటికి ఏ రేటు వర్తిస్తుందో అదే జీఎస్టీ రేటు క్రిప్టో ట్రాన్సాక్షన్‌కు వర్తిస్తుందని చెబుతున్నారు.క్రిప్టో ట్రేడింగ్ కోసం ట్యాక్స్ కలెక్టెట్ ఎట్ సోర్స్(TCS) నిబంధనను తీసుకు వస్తారా అని అడగగా, ఒకవేళ కొత్త చట్టం వస్తే అందులో అంతా ఉంటుందని రెవెన్యూ కార్యదర్శి తరుణ్ బజాజ్ అన్నారు.

కొద్దినెలలుగా క్రిప్టో కరెన్సీల్లో పెట్టుబడులపై ఇన్వెస్టర్లు ఆసక్తి చూపుతున్నారని తెలిసిందే. ఈ నేపథ్యంలో క్రిప్టోను పూర్తిగా నిషేధించడం కంటే వాటి నియంత్రణకే ఎక్కువమంది మొగ్గు చూపుతున్నారు. క్రిప్టో కరెన్సీల అంశంపై ఆర్బీఐ, వివిధ మంత్రిత్వ శాఖల సీనియర్ ఆఫీసర్లతో ప్రధాని నరేంద్ర మోడీ చర్చలు జరిపారు. ఈ నెల 29న మొదలయ్యే పార్లమెంట్ శీతాకాల సమావేశాల్లో క్రిప్టోకరెన్సీలపై బిల్లును కేంద్రం పరిచయం చేసే అవకాశముంది.