NSE co-location scam: చిత్ర రామకృష్ణను అరెస్ట్ చేసిన సీబీఐ

ఎన్ఎస్ఈ మాజీ సీఈవో చిత్రా రామకృష్ణను సీబీఐ అరెస్ట్ చేసింది. కో-లొకేషన్ స్కాంలో ఆమెను ప్రశ్నించిన సీబీఐ అధికారులు ఆ తర్వాత అదుపులోకి తీసుకున్నారు. ఆమె ముందస్తు బెయిల్ పిటిషన్ తిరస్కరించిన మరుసటి రోజు ఆదివారమే సీబీఐ ప్రశ్నించి, అరెస్ట్ చేసింది. ఆమె నేషనల్ స్టాక్ ఎక్స్చేంజ్ (NSE) ఎండీ, సీఈవోగా పని చేశారు.

ఎన్ఎస్ఈ డేటా సెంటర్‌లో ఒక స్టాక్ బ్రోకర్ సర్వర్ కో-లొకేషన్‌కు సంబంధించిన కేసులో చిత్రరామకృష్ణను ఢిల్లీలో అరెస్ట్‌ చేసినట్లు సీబీఐ వెల్లడించింది. వైద్య పరీక్షల అనంతరం సీబీఐ ప్రధాన కార్యాలయానికి ఆమెను తరలించినట్లు తెలిపారు. ఈ కేసులో ఇంతకు ముందే చిత్ర రామకృష్ణతో సహా పలువురిని సీబీఐ ప్రశ్నించింది.

చిత్ర రామకృష్ణకు ముందస్తు బెయిల్ మంజూరు చేసేందుకు శనివారం ఢిల్లీలోని సీబీఐ ప్రత్యేక కోర్టు నిరాకరించింది. త్వరలోనే ఈ కేసులో మరిన్ని అరెస్టులు ఉంటాయని భావిస్తున్నారు. ఈ కేసులో చిత్ర రామకృష్ణను ప్రభావితం చేసిన గుర్తు తెలియని హిమాలయ యోగి పాత్రపై సస్పెన్స్ కొనసాగుతుంది. ఈ హిమాలయ యోగి పాత్ర నిజమా, లేక కల్పితమా అనే అంశంపైనా సీబీఐ దర్యాప్తు చేస్తోంది.