Income Tax News: ఆ ట్యాక్స్ పేయర్స్‌కు IT శాఖ ఊరట.. వాటి ఫైలింగ్‌కు గడువు పొడిగింపు

IT Returns: సాధారణంగా ఏప్రిల్ నెల నుంచి పన్ను చెల్లింపుదారులతో పాటు ఆయా సంస్థలు చాలా బిజీగా మారిపోతుంటాయి. గడువులోగా ఆదాయపు పన్ను రిటర్నులను ఫైల్ చేసేందుకు శ్రమిస్తుంటాయి. కంపెనీలతో పాటు ఛారిటబుల్ ట్రస్టులు, మతపరమైన సంస్థలు కూడా ఇందుకు మినహాయింపు కాదు.

సెంట్రల్ బోర్డ్ ఆఫ్‌ డైరెక్ట్ ట్యాక్సెస్(CBDT) పన్ను చెల్లింపుదారులకు ఊరట కలిగించే ఓ కీలక నిర్ణయం తీసుకుంది. ఆధ్యాత్మిక సంస్థలతో పాటు ఛారిటబుల్ ట్రస్టులకు సంబంధించి ఫారం 10A/10AB దాఖలు చేసేందుకు మరో 2 నెలలు గడువును పొడిగిస్తున్నట్లు ప్రకటించింది. ఈ మేరకు సోషల్ మీడియా ప్లాట్‌ఫాం Xలో పోస్ట్ చేసింది.

ఇప్పటికే పలు దఫాలుగా 10A/10AB ఫారం సబ్మిషన్ కోసం CBDT గడువును పొడిగిస్తూ వచ్చింది. గతసారి సెప్టెంబర్ 30, 2023 వరకు అవకాశం ఇవ్వగా, ఇప్పుడు జూన్ 30, 2024 లోగా ఈ పని పూర్తి చేసేందుకు మరో ఛాన్స్ ఇచ్చింది. పన్ను చెల్లింపుదారులకు ఎదురవుతున్న సమస్యలు సహా పలువురి అభ్యర్థనలను పరిగణలోనికి తీసుకుని ఈ నిర్ణయానికి వచ్చినట్లు ప్రత్యక్ష పన్నుల బోర్డ్ తెలిపింది.

ఆయా సంస్థలు, ట్రస్టులు ఆదాయపు పన్ను మినహాయింపు కోసం రిజిస్టర్ చేసుకునేందుకు ఈ 10A ఫారమ్స్ ఫైల్ చేస్తుంటాయి. ఇక శాశ్వత రిజిస్ట్రేషన్ రెన్యువల్ కోసం 10ABని వినియోగిస్తాయి. AY 2022-23కి గాను 10A సమర్పించని సంస్థలకు ఇది మంచి అవకాశమని CBDT చెబుతోంది. తిరస్కరించబడిన రీ-రిజిస్ట్రేషన్స్ దాఖలు చేసేందుకూ దీన్ని వినియోగించుకోవాలని కోరింది.