పన్ను చెల్లింపుదారులకు మరో గిఫ్ట్.. బడ్జెట్ 2026 ఆసక్తికర అంచనాలు ఎలా ఉన్నాయంటే..

గత ఏడాది బడ్జెట్‌లో ఆర్థిక మంత్రి నిర్మలా సీతారామన్ తీసుకున్న నిర్ణయాలు భారతీయ మధ్యతరగతి పన్ను చెల్లింపుదారులకు పెద్ద ఊరటనిచ్చాయి. ముఖ్యంగా కొత్త పన్ను విధానం కింద ఆదాయపు పన్ను స్లాబ్‌లలో చేసిన మార్పులు, రూ.12 లక్షల వరకు ఆదాయాన్ని పన్ను రహితంగా చేయడం వంటి నిర్ణయాలు లక్షలాది మందికి ప్రత్యక్ష లాభాన్ని చేకూర్చాయి. ఈ నేపథ్యంలో, ఫిబ్రవరి 1న ప్రవేశపెట్టబోయే బడ్జెట్ 2026పై పన్ను చెల్లింపుదారుల అంచనాలు మరింత పెరిగాయి. ఈసారి కూడా ఆదాయపు పన్నులో మరో ఊరట ఉంటుందా? అనే ప్రశ్న ప్రధానంగా వినిపిస్తోంది.

అయితే పరిశ్రమ నిపుణుల అభిప్రాయం ప్రకారం.. Budget 2026 లో భారీ ఆదాయపు పన్ను కోతలు వచ్చే అవకాశం తక్కువగా ఉంది. గత బడ్జెట్‌లోనే సమగ్ర పన్ను సంస్కరణలు చేపట్టినందున, ఈసారి ప్రభుత్వం పన్ను వ్యవస్థను మరింత హేతుబద్ధీకరించడంపై, చిన్న కానీ ప్రయోజనకరమైన మార్పులపై దృష్టి సారించే అవకాశం ఉందని వారు చెబుతున్నారు. ముఖ్యంగా TDS నిబంధనలు, ప్రామాణిక మినహాయింపు (Standard Deduction) వంటి అంశాల్లో స్వల్ప మార్పులు ఉండవచ్చని అంచనా వేస్తున్నారు.

శ్రీరామ్ వెల్త్ సంస్థ COO నావల్ కగల్‌వాలా మాట్లాడుతూ.. 8వ వేతన సంఘం అమలు FY28లో ఉండటంతో ప్రభుత్వానికి ఆర్థిక పరంగా పరిమితి ఉంటుందని తెలిపారు. అందుకే బడ్జెట్ 2026లో వ్యక్తిగత ఆదాయపు పన్నులో పెద్ద మార్పులు ఆశించడం కష్టం అని ఆయన అభిప్రాయపడ్డారు. ఈసారి బడ్జెట్ ప్రధానంగా మూలధన వ్యయం, మౌలిక సదుపాయాల అభివృద్ధిపై దృష్టి పెట్టే అవకాశం ఉందన్నారు.

క్లియర్‌టాక్స్ వ్యవస్థాపకుడు అర్చిత్ గుప్తా ప్రకారం.. రూ. 25 లక్షల లోపు ఆదాయం ఉన్న పన్ను చెల్లింపుదారులకు కొత్త పన్ను విధానం మరింత ఆకర్షణీయంగా మారింది. సరళత, తక్కువ పన్ను రేట్లు కారణంగా ఇది ప్రజాదరణ పొందిందని ఆయన తెలిపారు. అయినప్పటికీ, సుమారు 26 శాతం మంది పన్ను చెల్లింపుదారులు ఇప్పటికీ పాత పన్ను విధానాన్నే ఎంచుకుంటున్నారు. దీనికి కారణం HRA, గృహ రుణాలు, EPF, PPF, ELSS వంటి దీర్ఘకాలిక పెట్టుబడులు వారి ఆర్థిక ప్రణాళికలో కీలకంగా ఉండటమేనని గుప్తా వివరించారు.

ఈ నేపథ్యంలో, కేవలం NPSకే కాకుండా ఇతర పొదుపు పథకాలకు కూడా మినహాయింపులు విస్తరించాలని నిపుణులు ప్రభుత్వాన్ని కోరుతున్నారు. మానవ్ రచనా విశ్వవిద్యాలయం ప్రొఫెసర్ సునీల్ కుమార్ రాయ్ కూడా పాత-కొత్త పన్ను విధానాల మధ్య మరింత స్పష్టత, సరళీకరణ అవసరమని అన్నారు.

ఇక జీతం పొందే ఉద్యోగుల విషయానికి వస్తే.. ప్రామాణిక మినహాయింపు పెంపుపై భారీ ఆశలు ఉన్నాయి. ప్రస్తుతం పాత పన్ను విధానంలో ఇది రూ. 75,000 కాగా, కొత్త పన్ను విధానంలో రూ.50,000 మాత్రమే ఉంది. దీనిని రూ. 1 లక్షకు పెంచాలని పన్ను చెల్లింపుదారులు డిమాండ్ చేస్తున్నారు. ఫిన్నోవేట్ CEO నేహల్ మోటా ప్రకారం.. ప్రామాణిక మినహాయింపు పెంపు పెరుగుతున్న జీవన వ్యయాలను ఎదుర్కోవడంలో జీతం పొందే వర్గానికి గణనీయమైన ఉపశమనం ఇస్తుంది.

క్లుప్తంగా చెప్పాలంటే.. బడ్జెట్ 2026లో భారీ ఆదాయపు పన్ను కోతలు రావడం కష్టమే అయినప్పటికీ, ప్రామాణిక మినహాయింపు పెంపు, పన్ను విధానాల సరళీకరణ వంటి చిన్న కానీ ప్రభావవంతమైన మార్పులు రావచ్చనే ఆశ మాత్రం కొనసాగుతోంది. ఇవి మధ్యతరగతి పన్ను చెల్లింపుదారులకు మరోసారి ఊరటనిచ్చే అవకాశం ఉంది.