టెక్నికల్ లోపంపై ముందే సమాచారమివ్వాలి, లేదంటే రూ.20,000 ఫైన్

సాంకేతిక సమస్యలకు సంబంధించి బీఎస్ఈ, ఎన్ఎస్ఈ కొత్త గైడ్ లైన్స్‌తో ముందుకు వచ్చాయి. ట్రేడింగ్ అవాంతరాలను నిరోధించేందుకు బ్రోకింగ్ సంస్థలు, ఇతర సభ్యుల సాంకేతిక వ్యవస్థల్లో లోపాలకు సంబంధించి స్టాక్ ఎక్స్చేంజీలు సమగ్ర మార్గదర్శకాలను విడుదల చేశాయి. సభ్యులు తమ సాంకేతిక వ్యవస్థలో తలెత్తిన లోపాలపై నిర్దేశిత సమయంలో సమాచారం అందించాలని, లేని పక్షంలో ఎక్స్చేంజీకి రూ.20,000 చొప్పున చెల్లించవలసి ఉంటుందని స్టాక్ ఎక్స్చేంజీలు వేర్వేరుగా సర్క్యులర్‌ను జారీ చేశాయి.

టెక్నికల్ లోపాల కారణంగా ట్రేడింగ్ కార్యకలాపాలకు అవాంతరాలు కలగకుండా సభ్యులు ఏర్పాటు చేసుకోవాల్సిన టెక్నాలజీ మౌలిక వసతులు, వ్యవస్థకు సంబంధించి ఈ మార్గదర్శకాల్లో స్పష్టంగా పేర్కొంది. 2022 మార్చి నాటికి ఈ ఏర్పాట్లు అన్నీ పూర్తి కావాలని తేల్చి చెప్పింది. అంతేకాదు, సాంకేతిక లోపంపై సమాచారం అందించేందుకు వీలుగా స్టాండర్డ్ ఆపరేటింగ్ ప్రొసీజర్‌ను కూడా సూచించాయి.

ఇదిలా ఉండగా, మార్కెట్లు నిన్న భారీ నష్టాల్లో ముగిశాయి. ఒమిక్రాన్ భయాలు అంతర్జాతీయ, తదనుగుణంగా దేశీయ మార్కెట్లను కుప్పకూల్చాయి. హెచ్‌పీ అథెసివ్స్ ఇష్యూ నిన్న ముగిసింది. దీనికి 21 రెట్ల ఆదరణ లభించింది. రిటైల్ విభాగంలో 81.24 రెట్ల స్పందన వచ్చింది. సుప్రియా, లైఫ్ సైన్స్ ఐపీవో రెండో రోజు ముగింపుకు 5.69 రెట్ల స్పందన లభించింది. రిటైల్ విభాగంలో 25.38 రెట్లు అధికంగా బిడ్స్ వచ్చాయి. సోమవారంతో ఈ ఇష్యూ ముగుస్తుంది.