ఐదేళ్లలో BCCI కట్టిన ఇన్‌కం ట్యాక్స్ ఎంతో తెలుసా.. ఇదీ వరల్డ్స్ రిచ్చెస్ట్ క్రికెట్ బోర్డు రేంజ్‌!

Cricket: దేశంలో ప్రజలు పలు వేడుకలు జరుపుకుంటున్నా.. కుల, మత, ప్రాంత బేధం లేకుండా అందరూ ఏకమై చేసుకునే పండుగ క్రికెట్. ఇక IPL జరుగుతుంది అంటే క్రికెట్ అభిమానుల్లో ఉండే జోషే వేరు. క్రికెట్ ను ఇంతగా ఆరాధిస్తున్నారు కాబట్టే ప్రపంచంలోనే అత్యంత ధనిక బోర్డుగా భారత క్రికెట్ నియంత్రణ మండలి(BCCI) కొనసాగుతోంది.

పరిమితికి మించి ఆదాయం పొందుతున్న ఏ సంస్థ అయినా ప్రభుత్వానికి పన్ను చెల్లించాల్సిందే కదా. మరి ఏటా భారీ మొత్తంలో ఆర్జించే BCCI ఎంత ట్యాక్స్ కట్టిందో తెలుసా..? 2021-22 ఆర్థిక సంవత్సరానికి గాను 1,159 కోట్ల ఆదాయపు పన్ను చెల్లించింది. అయితే అంతకు ముందు ఏడాదితో పోలిస్తే ఇది 37 శాతం ఎక్కువ కావడం గమనార్హం.

రాజ్యసభలో అడిగిన ఓ ప్రశ్నకు ఆర్థికశాఖ సహాయ మంత్రి పంకజ్ చౌదరి ఈ మేరకు లిఖితపూర్వక సమాధానం ఇచ్చారు. BCCI దాఖలు చేసిన రిటర్నుల ఆధారంగా గత ఐదేళ్లలో ఆ సంస్థ చెల్లించిన ఆదాయపు పన్ను, రాబడి, ఖర్చు వివరాలు తెలియజేశారు.

2021-22 ఆర్థిక సంవత్సరంలో 7 వేల 606 కోట్ల రూపాయల ఆదాయాన్ని BCCI ఆర్జించగా.. దాని వ్యయం దాదాపు 3 వేల 64 కోట్ల రూపాయలుగా ఉన్నట్లు మంత్రి వెల్లడించారు. 2020-21లో 844.92 కోట్లు, 2019-20లో 882.29 కోట్లు, FY2019లో 815.08 కోట్లు, 2017-18లో 596.63 కోట్ల మేర ట్యాక్స్ పే చేసినట్లు స్పష్టం చేశారు.