కరోనా-లాక్‌డౌన్: 2020 క్యాలెండర్ ఇయర్లో భారత వృద్ధి రేటు అంచనా 'జీరో'

కరోనా మహమ్మారి దెబ్బకు భారత్ లాక్ డౌన్‌లో ఉంది. దీనిని మే 3వ తేదీ వరకు పొడిగిస్తున్నట్లు ప్రధాని నరేంద్ర మోడీ నేడు (ఏప్రిల్ 14) ప్రకటించారు. ఈ మూడు వారాల లాక్ డౌన్ సమయంలోనే భారత ఆర్థిక వ్యవస్థ భారీగా పడిపోతుందని రేటింగ్ ఏజెన్సీలు వెల్లడించాయి. ఒక్కో సంస్థ ఒక శాతం నుండి 3.5 శాతం మాత్రమే ఉంటుందని తెలిపాయి. అయితే మొదటిసారి జీడీపీ (గ్రాస్ డొమెస్టిక్ ప్రోడక్ట్) సున్నా శాతంగా ఉంటుందని ఓ రేటింగ్ ఏజెన్సీ తెలిపింది.

భారత వృద్ధి రేటు 0.0 శాతానికి కుదింపు

2020 క్యాలెండర్ ఏడాదిలో భారత వృద్ధి రేటు అంచనాను అంతకుముందు ఉన్న 2.5 శాతం నుండి 0.0 శాతానికి కుదించింది బార్క్స్లే ఎమర్జింగ్ మార్కెట్స్ రీసెర్చ్. అదే సమయంలో 2020-21 ఆర్థిక సంవత్సరానికి గాను వృద్ధి రేటును 3.5 శాతం నుండి 0.8 శాతానికి కుదించింది. ఈ మేరకు బార్క్స్లే తన అంచనాను విడుదల చేసింది.

అందుకే వృద్ధి రేటు కుదింపు

భారత్‌లో కరోనా కేసులు పెరుగుతున్నాయి. దీంతో మే 3వ తేదీ వరకు లాక్ డౌన్‌ను పొడిగిస్తున్నట్లు ప్రధాని నరేంద్ర మోడీ ప్రకటించారు. ఇప్పటికే ఆర్థిక వ్యవస్థపై భారీ ప్రభావం పడింది. లాక్ డౌన్ పొడిగింపు వల్ల ఈ ప్రభావం ఎక్కువగానే ఉంటుందని అంచనా వేస్తున్నారు.

234.4 బిలియన్ డాలర్ల నష్టం

వివిధ రంగాల్లో ఆర్థిక నష్టం 234.4 బిలియన్ డాలర్లు (జీడీపీలో 8.1 శాతం) ఉంటుందని అంచనా వేసింది. అయితే మే చివరి వరకు లాక్ డౌన్ పొడిగిస్తే ఈ మేర నష్టం ఉంటుందని అంచనా వేసింది. ఇంతకుముందు మొదటిసారి లాక్ డౌన్ ప్రకటన సమయంలో దాదాపు 120 బిలియన్ డాలర్ల నష్టం ఉంటుందని వెల్లడించింది. దాని కంటే దాదాపు రెండింతలు ఉంటుందని తాజా నివేదిక తెలిపింది. ఈ నేపథ్యంలో జీడీపీ వృద్ధి రేటును 2020 క్యాలెండర్ ఇయర్లో 2.5 శాతం నుండి 0.0 శాతానికి సమీక్షించినట్లు తెలిపింది.

లాక్ డౌన్

తమ అంచనా ప్రకారం లాక్ డౌన్ పూర్తిగా జూన్ ప్రారంభం నాటికి ముగియవచ్చునని అంచనా ఉందని తెలిపింది. లాక్ డౌన్ కారణంగా భారత ఆర్థిక వ్యవస్థపై తీవ్రంగానే ప్రభావం పడుతోందని తెలిపింది. కాగా, వివిధ రేటింగ్ ఏజెన్సీలు కూడా భారత ఆర్థిక వ్యవస్థపై లాక్ డౌన్ ప్రభావం ఎక్కువే ఉంటుందని చెబుతున్నాయి.