మారుతీ సుజుకీ, మహీంద్రా అదరగొట్టాయి... స్టాక్స్ జంప్: డిసెంబర్ సేల్స్ ఎలా ఉన్నాయంటే

2020 డిసెంబర్ నెలలో ఆటో సేల్స్ పెరిగాయి. దేశీయ ఆటో మొబైల్ దిగ్గజం మారుతీ సుజుకీ ఇండియా(MSI) విక్రయాలు గత ఏడాది చివరి నెలలో ఏడాది ప్రాతిపదికన 20 శాతం పెరిగాయి. 2020 డిసెంబర్ నెలలో మారుతీ విక్రయాలు 160,226గా నమోదయ్యాయి. 2020-21 ఆర్థిక సంవత్సరం మూడో త్రైమాసికంలో 495,897 యూనిట్లుగా నమోదయ్యాయి. ఏడాది ప్రాతిపదికన 13.4 శాతం వృద్ధిని నమోదు చేశాయి. డొమెస్టిక్ సేల్స్ 146,480గా ఉన్నాయి. కంపెనీ ఎగుమతులు 9,938గా నమోదయ్యాయి.

ఎంత పెరిగాయంటే

ఆల్టో, ఎస్ ప్రెస్సో వంటి మినీ కారు సేల్స్ 4.4 శాతం వృద్ధిని నమోదు చేసి, 24,927 యూనిట్లుగా నమోదయ్యాయి. 2019 డిసెంబర్ నెలలో ఈ సేల్స్ 23,883గా ఉన్నాయి.

వాగన్ఆర్, స్విఫ్ట్, సెలెరియో, ఇగ్నిస్, బాలెనో, డిజైర్ వంటి కాంపాక్ట్ సెగ్మెంట్ కారు సేల్స్ ఏకంగా 18.2 శాతం వృద్ధిని నమోదు చేశాయి. 2019 డిసెంబర్‌లో 65,673 యూనిట్లు కాగా, 2020 డిసెంబర్ నెలలో 77,641 యూనిట్లు సేల్ అయ్యాయి.

సియాజ్ వంటి మిడ్ సైజ్ కారు సేల్స్ ఏడాది ప్రాతిపదికన 28.9 శాతం క్షీణతను నమోదు చేశాయి. 2019 డిసెంబర్ నెలలో 1,786 యూనిట్లు కాగా, గత నెలలో 1,270 యూనిట్లకు క్షీణించాయి.

యుటిలిటీ వెహికిల్ సేల్స్ (విటారా బ్రెజ్జా, ఎస్ క్రాస్, ఎక్ఎల్ 6, ఎర్టిగా) సేల్స్ 8 శాతం పెరిగాయి. అంతకుముందు ఏడాది డిసెంబర్‌లో 23,808 యూనిట్లు సేల్ కాగా, గత నెలలో 25,701 యూనిట్లు నమోదయ్యాయి.

ఎగుమతులు 31 శాతం జంప్

ఎగుమతుల విషయానికి వస్తే ఏడాది ప్రాతిపదికన 31.4 శాతం పెరిగాయి. 2019 డిసెంబర్ నెలలో 7,561 యూనిట్లు కాగా, గత నెలలో 9,938 యూనిట్లకు పెరిగాయి.

ఇక, అక్టోబర్-డిసెంబర్ త్రైమాసికంలో ఈ ఆటో దిగ్గజం సేల్స్ 13.4 శాతం పెరిగి 4,95,897 యూనిట్లుగా నమోదయ్యాయి.

కాగా, మారుతీ సుజుకీ షేర్ ధర జనవరి 1, 2021న 0.76 శాతం లాభపడి రూ.7,708 వద్ద ట్రేడ్ అయింది.

మహీంద్రా సేల్స్ అదుర్స్, స్టాక్ జంప్

మరో దేశీయ ఆటో దిగ్గజం మహీంద్రా అండ్ మహీంద్రా సేల్స్ డిసెంబర్ నెలలో పెరిగాయి. దీంతో నేడు ఈ స్టాక్ జంప్ చేసింది. ఓ సమయంలో దాదాపు 3 శాతం మేర లాభపడింది. మహీంద్రా కంపెనీ పాసింజర్ వెహికిల్స్, కమర్షియల్ వెహికిల్స్, ఎగుమతులు... అన్నీ కలిపి 2020 డిసెంబర్ నెలలో 35,187 యూనిట్లుగా నమోదయ్యాయి. 2019 డిసెంబర్ నెలలో ఇది 39,230 యూనిట్లుగా ఉన్నాయి.

యుటిలిటీ వెహికిల్ సెగ్మెంట్ విషయానికి వస్తే 5 శాతం వృద్ధితో 15,225 యూనిట్ల నుండి 16,050 యూనిట్లకు, పాసింజర్ వెహికిల్ సేల్స్ 3 శాతం పెరిగి 16,182 యూనిట్లుగా నమోదయ్యాయి.