Anil Ambani: సరికొత్త వ్యాపారంలోకి అనిల్ అంబానీ.. అన్నతో పోటీకి సిద్ధంగా..

Reliance Infra: ఇటీవలి కాలంలో అనిల్ అంబానీ కొత్త వ్యాపార ఆలోచనలతో తిరిగి వస్తున్నారు. దీంతో తిరిగి తాను గతంలో కోల్పోయిన వైభవాన్ని పొందాలని ఆయన తీవ్రంగా ప్రయత్నిస్తున్నారు.

ఈ క్రమంలోనే అనిల్ అంబానీకి చెందిన రిలయన్స్ ఇన్‌ఫ్రాస్ట్రక్చర్ ఎలక్ట్రిక్ కార్లు, బ్యాటరీలను తయారు చేసే ప్రణాళికలను పరిశీలిస్తోంది. ఇందుకోసం అనిల్ ఇప్పటికే చైనాకు చెందిన ప్రముఖ ఆటో మేకర్ BYD కంపెనీ మాజీ భారతీయ అధిపతిని నియమించుకుంది. ఏడాది 2.5 లక్షల వాహనాల తయారీ కెపాసిటీతో ఈవీ ప్లాంట్ ఏర్పాటుకు సలహాదారులను నియమించుకున్నట్లు రాయిటర్స్ వార్తా సంస్థ వెల్లడించింది. ఈ ప్రణాళిక ద్వారా రానున్న కొద్ది సంవత్సరాల్లో 7,50,000 వాహనాలను తయారు చేసేందుకు కంపెనీ కృషి చేస్తుంది.

అలాగే అనిల్ అంబానీ కంపెనీ 10 గిగావాట్ గంటల(GWh) సామర్థ్యంతో ప్రారంభమయ్యే బ్యాటరీ ప్లాంట్‌ను నిర్మించే సాధ్యాసాధ్యాలను కూడా పరిశీలిస్తోందని సమాచారం. అయితే రిలయన్స్ ఇన్‌ఫ్రాస్ట్రక్చర్ మాత్రం అధికారికంగా దీనిపై ఇప్పటి వరకు ఎలాంటి ప్రకటన చేయలేదు. మూలాల ప్రకారం రిలయన్స్ ఇన్‌ఫ్రాస్ట్రక్చర్ చైనా కంపెనీలతో సహా భాగస్వాముల కోసం కూడా వెతుకుతోందని తెలుస్తోంది. ఈ క్రమంలో ముఖేష్ కంపెనీ ఇప్పటికే స్థానికంగా బ్యాటరీలను తయారు చేయడానికి కృషి చేస్తోంది. ఈ వారం 10 GW బ్యాటరీ సెల్ ఉత్పత్తికి మద్దతు ఇవ్వడానికి ప్రభుత్వ సబ్సిడీ కోసం బిడ్‌ను గెలుచుకుంది. ఈ లెక్కన అనిల్ అంబానీ తన బ్యాటరీ ప్లాంట్ విషయంలో అన్నతో పోటీ పడక తప్పదని తెలుస్తోంది.

గత ఏడాది దేశంలో విక్రయించబడిన 42 లక్షల కార్లలో ఎలక్ట్రిక్ వాహనాల వాటా 2% కంటే తక్కువగా ఉంది. అయితే 2030 నాటికి ప్రభుత్వం దానిని 30%కి పెంచాలని చూస్తోంది. ఈ క్రమంలో స్థానికంగా EVలు, వాటి భాగాలను తయారు చేసే కంపెనీలకు $5 బిలియన్ల కంటే ఎక్కువ ప్రోత్సాహకాలను బడ్జెట్‌లో కేటాయించింది. అయితే ఇండియా ఇప్పటికీ బ్యాటరీ టెక్నాలజీల విషయంలో ఇప్పటికీ ప్రారంభ దశల్లోనే ఉంది. ఈ క్రమంలో అమర రాజా వంటి కొన్ని స్థానిక బ్యాటరీ తయారీదారులు దేశంలో లిథియం-అయాన్ బ్యాటరీ సెల్‌లను తయారు చేసే సాంకేతికతను కొనుగోలు చేయడానికి ఇప్పటికే చైనా కంపెనీలతో జతకట్టిన సంగతి తెలిసిందే.

రిలయన్స్ ఇన్‌ఫ్రాస్ట్రక్చర్ ఆటోమొబైల్స్‌కు సంబంధించి రెండు కొత్త పూర్తి యాజమాన్య అనుబంధ సంస్థలను ఏర్పాటు చేసింది. వీటిలో ఒకదాని పేరు రిలయన్స్ EV ప్రైవేట్ లిమిటెడ్. ప్రస్తుతం రిలయన్స్ ఇన్‌ఫ్రా షేర్లు శుక్రవారం ఒక్కొక్కటి 1.66 శాతం పెరిగి రూ.213.45 వద్ద ఎన్ఎస్ఈలో ముగిశాయి.