అమెరికా అధ్యక్ష రేసులో తెలుగింటి అల్లుడు.. ట్రంప్ మీద 25వ సవరణ ప్రయోగిస్తారా.. సాధ్యాసాధ్యాలు ఎలా ఉన్నాయంటే..

అమెరికా రాజకీయాల్లో ప్రస్తుతం నెలకొన్న అత్యంత ఉత్కంఠభరితమైన రాజకీయాలు నడుస్తున్నాయి. ఇరాన్ విషయంలో అధ్యక్షుడు డొనాల్డ్ ట్రంప్ అనుసరిస్తున్న దూకుడు వైఖరి, ఆయన చేసిన వివాదాస్పద వ్యాఖ్యలు స్వదేశంలోనే పెద్ద ఎత్తున రాజకీయ దుమారాన్ని రేపుతున్నాయి. ముఖ్యంగా ట్రంప్ మానసిక స్థితిపై అటు డెమొక్రాట్లు, ఇటు రిపబ్లికన్ పార్టీలోని కొందరు నేతలు అనుమానాలు వ్యక్తం చేస్తూ, రాజ్యాంగంలోని 25వ సవరణ' (25th Amendment)ను ప్రయోగించి ఆయనను పదవి నుండి తొలగించాలనే చర్చను తెరపైకి తెచ్చారు.

ఈ మొత్తం వ్యవహారంలో ఉపాధ్యక్షుడు జె.డి. వాన్స్ పాత్ర ఇప్పుడు అత్యంత కీలకంగా మారింది. ఇరాన్‌పై యుద్ధం ప్రకటించడం, పవర్ ప్లాంట్లు, వంతెనలను ధ్వంసం చేస్తామని ట్రంప్ హెచ్చరించడం వంటి చర్యలు అమెరికాను ప్రమాదంలోకి నెడుతున్నాయని విమర్శకులు భావిస్తున్నారు. ట్రంప్ తన సోషల్ మీడియా ప్లాట్‌ఫామ్ 'ట్రూత్ సోషల్‌'లో వాడిన భాష, గడువు ముగిస్తే "నరకం చూపిస్తా" అని చేసిన వ్యాఖ్యలు ఆయన పరిణతిపై ప్రశ్నలు లేవనెత్తాయి. ఈ నేపథ్యంలోనే, అధ్యక్షుడు తన బాధ్యతలను నిర్వర్తించడానికి తగిన మానసిక స్థితిలో లేరని భావిస్తే, ఉపాధ్యక్షుడు, మంత్రిమండలి మెజారిటీ సభ్యులు కలిసి ఆయనను పదవి నుండి తప్పించే అధికారం 25వ సవరణ కల్పిస్తుంది.

అయితే, జె.డి. వాన్స్ ఈ ప్రతిపాదనలను తీవ్రంగా ఖండిస్తున్నారు. ట్రంప్ తీసుకుంటున్న నిర్ణయాలు అమెరికా ప్రయోజనాల కోసమేనని, హార్ముజ్ జలసంధిని తెరిపించడం ద్వారా ప్రపంచ ఆర్థిక వ్యవస్థను రక్షించడమే తమ లక్ష్యమని ఆయన సమర్థిస్తున్నారు. విపక్షాలు కేవలం రాజకీయ లబ్ధి కోసమే ఇటువంటి కుట్రలు చేస్తున్నాయని ఆయన ఆరోపించారు. మరోవైపు, ఇరాన్ నావికాదళం, రాజకీయ నాయకులు ట్రంప్ వ్యాఖ్యలను తీవ్రంగా పరిగణిస్తూ.. అమెరికాను "ఊబిలోకి" లాగుతున్నారని హెచ్చరించడం పరిస్థితి తీవ్రతను తెలియజేస్తోంది.

పిచ్చి బాస్టర్డ్స్‌ అంటూ ఇరాన్ మీద విరుచుకుపడిన ట్రంప్.. హార్మూజ్ జలసంధిపై తగ్గేదేలే అంటున్న ఇరాన్..

ఇరాన్ యుద్ధంలో అమెరికా ఇప్పటికే భారీగా యుద్ధ విమానాలను, డ్రోన్లను కోల్పోయిందన్న వార్తలు వస్తున్న తరుణంలో.. అమెరికా కాంగ్రెస్‌లో కూడా ఆందోళన మొదలైంది. యుద్ధం వల్ల కలిగే ప్రాణ, ఆస్తి నష్టాలను అంచనా వేస్తూ, ట్రంప్ తన వ్యక్తిగత పంతం కోసం దేశాన్ని యుద్ధంలోకి నెడుతున్నారా? అనే కోణంలో చర్చలు జరుగుతున్నాయి. 25వ సవరణను ప్రయోగించడం అనేది అమెరికా చరిత్రలో అత్యంత అరుదైన, కఠినమైన ప్రక్రియ. దీనికి ఉపాధ్యక్షుడి మద్దతు తప్పనిసరి. వాన్స్ ఇప్పటి వరకు ట్రంప్‌కు అండగా నిలుస్తున్నప్పటికీ, యుద్ధం తీవ్రరూపం దాల్చి అమెరికాకు మరిన్ని నష్టాలు వాటిల్లితే రాజకీయ సమీకరణాలు మారే అవకాశం ఉందని విశ్లేషకులు భావిస్తున్నారు.

ఇక జేడీ వాన్స్ ని మన తెలుగింటి అల్లుడుగా చెప్పుకోవచ్చు. JD వాన్స్ భార్య ఉషా చిలుకూరి వాన్స్ (Usha Chilukuri Vance) ఆంధ్రప్రదేశ్‌కు చెందిన, అమెరికాలో స్థిరపడిన తెలుగు కుటుంబంలో జన్మించిన భారతీయ-అమెరికన్ న్యాయవాది.2025 నుండి యునైటెడ్ స్టేట్స్ యొక్క రెండవ మహిళగా వ్యవహరిస్తున్న ఉషా, ఈ పదవి చేపట్టిన మొదటి భారతీయ-అమెరికన్ కావడం విశేషంగా చెప్పుకోవచ్చు. ఉషా కుటుంబం ఆంధ్రప్రదేశ్‌లోని కృష్ణా, పశ్చిమ గోదావరి జిల్లాలకు చెందిన తెలుగు బ్రాహ్మణులు.కాలిఫోర్నియాలో జన్మించిన ఉషా, హిందూ సాంప్రదాయాల మధ్య పెరిగారు.D వాన్స్‌ను 2014లో వివాహం చేసుకున్నారు. వీరికి ముగ్గురు పిల్లలు ఉన్నారు.

క్లుప్తంగా చెప్పాలంటే పశ్చిమాసియాలో జరుగుతున్న ఈ భౌగోళిక రాజకీయ పోరు ఇప్పుడు వాషింగ్టన్ డి.సి.లోని అధికార పీఠాన్ని కదిలిస్తోంది. ఇటు ఇరాన్‌తో యుద్ధం, అటు స్వదేశంలో రాజ్యాంగపరమైన సంక్షోభం మధ్య అమెరికా ఒక క్లిష్టమైన దశలో ఉంది. Trump విధించిన గడువు ముగిసిన తర్వాత మంగళవారం నాడు జరిగే పరిణామాలు కేవలం ఇరాన్ భవిష్యత్తునే కాకుండా, డొనాల్డ్ ట్రంప్ అధ్యక్ష పదవిని కూడా శాసించే అవకాశం ఉంది. ఈ పరిణామాలన్నీ అమెరికా రాజకీయ చరిత్రలో ఒక చీకటి అధ్యాయంగా మిగిలిపోతాయా లేక ట్రంప్ తన పట్టును నిరూపించుకుంటారా అనేది వేచి చూడాలి.