ఏఐ ఉద్యోగాలు: ఐటీలో ఊహించని బూమ్! మీ కెరీర్ మారబోతోంది!

ఏఐ (AI), సెమీకండక్టర్ చిప్ రంగాల్లో పెట్టుబడులు తగ్గుముఖం పట్టినప్పటికీ, ఏఐ టెక్నాలజీని ప్రపంచవ్యాప్తంగా అందుబాటులోకి తీసుకురావాలంటే ఐటీ సేవల రంగమే కీలకమనే అభిప్రాయం టెక్ వర్గాల్లో బలపడుతోంది.

ఈ కారణంగానే గత నెల రోజులుగా ఐటీ షేర్లు పుంజుకుంటున్నాయి. దీని ఫలితంగా భారత ఐటీ కంపెనీల్లో ఉద్యోగ అవకాశాలు కూడా పెరగడం మొదలైంది.

ఏఐ టెక్నాలజీ విస్తరించినప్పటి నుంచి భారత ఐటీ సేవల రంగంలో నియామకాలు, ఉద్యోగుల సంఖ్య పెరుగుదల చాలా మందగించింది. అయితే, జులై నెలలో ఈ పరిస్థితి పూర్తిగా మారిపోయినట్లు స్పష్టమవుతోంది.

నౌకరీ జాబ్‌స్పీక్ ఇండెక్స్ డేటా ప్రకారం, జూన్ నెలలో ఐటీ సేవల రంగంలో నియామకాలు 3% తగ్గగా, జులైలో ఏకంగా 6% పెరిగాయి. అయితే, మొత్తం వైట్ కాలర్ ఉద్యోగాలను పరిగణనలోకి తీసుకుంటే, జులైలో వృద్ధి కేవలం 5% మాత్రమే నమోదైంది. ఇది జూన్‌లోని 6% వృద్ధితో పోలిస్తే తక్కువే.

కార్పొరేట్ ఉద్యోగాలు మొత్తంగా తగ్గడం చూస్తుంటే.. ఏఐ, ఆటోమేషన్ కారణంగా ఉద్యోగుల అవసరం వేగంగా తగ్గుతోందని అర్థమవుతోంది. అదే సమయంలో, ఐటీ రంగంలో నమోదైన వృద్ధి.. ఈ రంగంలో కొత్త వ్యాపార అవకాశాల వల్ల మరిన్ని ఉద్యోగాలు పుట్టుకొస్తున్నాయని సూచిస్తోంది.

జూన్ మాదిరిగానే జులైలో కూడా ఆర్టిఫిషియల్ ఇంటెలిజెన్స్ (AI), మెషిన్ లెర్నింగ్ (ML) రంగాల్లోనే అత్యధిక ఉద్యోగ అవకాశాలు నమోదయ్యాయి. ఈ రంగంలో నియామకాలు ఏకంగా 33% వృద్ధిని నమోదు చేశాయి. జూన్‌లో ఈ వృద్ధి 16%గా ఉండటం గమనార్హం.

ఐటీ రంగం తిరిగి వృద్ధి బాట పట్టడంతో, దేశంలో ఫ్రెషర్స్‌కు కూడా మంచి రోజులు వస్తున్నాయి. జులై నెలలో ఫ్రెషర్ల కేటగిరీలో నియామకాలు 6% పెరిగాయని నౌకరీ తెలిపింది.

ఇక జులైలో అత్యధిక నియామకాలు జరిపిన నగరాల జాబితాలో కోల్‌కతా 17% వృద్ధితో అగ్రస్థానంలో నిలిచింది. ఆ తర్వాత హైదరాబాద్ (16%), చెన్నై (11%), బెంగళూరు (8%) నగరాలు ఉన్నాయి.

అదేవిధంగా, టైర్-2 నగరాల్లో ఇండోర్ 10% వృద్ధితో మొదటి స్థానంలో ఉంది. దీని తర్వాత గౌహతి (9%), కోయంబత్తూర్ (7%), జైపూర్ (7%) నగరాలు ఉన్నాయి.