కిలో ఉల్లి రూ.150 వరకు, రెండింతలు పెరిగిన టమాటా

ఉల్లి ధరలు రోజు రోజుకు పెరుగుతున్నాయి. మంగళవారం పలు ప్రాంతాల్లో కిలో ఉల్లి రూ.100 కంటే పైకి చేరుకుంది. పలుచోట్ల రూ.120 నుంచి రూ.130 వరకు కూడా ఉంది. ఉల్లి ధర మొదటిసారి రూ.100 పైకి చేరుకుందని, భారీ వర్షాలు, వరదల కారణంగా ఉల్లి దిగుబడి తగ్గడం సహా ఎన్నో కారణాలు ఉన్నాయని చెబుతున్నారు.

మహారాష్ట్ర వాషీ అగ్రికల్చరల్ ప్రోడక్ట్ మార్కెట్ కమిటీ (APMC)లో కిలో ఉల్లి ధర రూ.120 కంటే పైకి చేరుకుందని, రిటైల్ ధరలు రూ.140 నుంచి రూ.150 వరకు కూడా ఉందని చెబుతున్నారు. తొలిసారిగా ఇక్కడ రూ.100 దాటింది. లాసాల్‌గావ్ మార్కెట్లో కిలో ఉల్లి రూ.130 పలుకుతోంది. ఓ వైపు ఉల్లి ధరలు సామాన్యులకు కంటనీరు తెప్పిస్తుంటే టమాటా ధరలు కూడా అలాగే ఉన్నాయి.

టమాడా ధర ఒక్కసారిగా రెండింతలు అయింది. దీంతో సామాన్యుడిపై భారం పడుతోంది. రెండు రోజుల క్రితం వరకు కిలో టమాటా రూ.24కు కాస్త అటు ఇటుగా ఉండగా ఇప్పుడు దాదాపు రూ.50కి చేరుకుంది. తెలుగు రాష్ట్రాల్లో అత్యధికంగా టమాటా వచ్చే మదనపల్లె మార్కెట్లో దీని ధర రూ.48గా ఉంది.

కొద్ది రోజులుగా కురుస్తున్న వర్షాలకు పంట దిగుబడి తగ్గి మార్కెట్‌కు రాలేదు. దీంతో ధరలు ఒక్కసారిగా పెరిగిపోయాయి. వర్షాల కారణంగా రైతులు టమోటాను కోయలేదు. దీంతో దిగుబడి తగ్గింది. పెరిగిన ధరలు సామాన్యులకు చుక్కలు చూపిస్తున్నాయి.