5G స్పెక్ట్రం వేలం దిశగా వేగంగా అడుగులు, అలా చేస్తే మే నెలలోనే

దేశంలో 5G వేలానికి వేగంగా అడుగులు పడుతున్నాయి. 2022లోనే 5G సేవలను అందుబాటులోకి తీసుకువస్తామని కేంద్రం గతంలో ప్రకటించింది. ఇందుకు అనుగుణంగా 5G స్పెక్ట్రం వేలం ప్రక్రియ నిర్వహణకు రంగం సిద్ధమవుతోంది. మే నెలలో ఈ ప్రక్రియ నిర్వహించే అవకాశముందని టెలికం విభాగానికి చెందిన ఓ సీనియర్ అధికారి తెలిపారు. వేలం ప్రక్రియకు సంబంధించి టెలికం నియంత్రణ సంస్థ ట్రాయ్ మార్చి చివరి నాటికి సిఫార్సులను పంపించనుందని టెలికం కార్యదర్శి తెలిపారు. వేలం నిర్వహణ బాధ్యతలకు ఎంఎస్టీసీ ఎంపికయింది.

అక్కడికి నెల రోజులు మిగిలిన ప్రక్రియకు సమయం పడుతుందన్నారు. అదే సమయంలో వేలం ప్రక్రియకు సంబంధించి ఇతర ప్రక్రియలను టెలికం విభాగం వేగవంతం చేయనుందన్నారు. గతంలో ట్రాయ్ సిఫార్సులు పంపించిన రెండు నెలల నుండి నాలుగు నెలలకు వేలం ప్రక్రియ జరిగేది. ఈసారి ట్రాయ్ నుండి సిఫార్సులు అందుకున్న రెండు నెలల్లోనే వేలం ప్రక్రియను టెలికం విభాగం పూర్తి చేయనున్నట్లు తెలిపారు.

స్పెక్ట్రం ధర, కేటాయింపు, స్పెక్ట్రం బ్లాక్ సైజ్, పేమెంట్ టర్మ్స్ అండ్ కండిషన్స్ విషయంలో ట్రాయ్ నుండి డాట్ సిఫార్సులను ఆహ్వానిస్తుంది. ఆ మేరకు ట్రాయ్ టెలికం పరిశ్రమ, ఇతర భాగస్వామ్యపక్షాలతో సంప్రదింపులు జరిపి డాట్‌కు ప్రతిపాదనలు పంపుతుంది. దీనిపై డాట్‌లోని డిజిటల్ కమ్యూనికేషన్స్ కమిషన్ నిర్ణయం తీసుకొని, మంత్రివర్గ ఆమోదానికి పంపిస్తుంది. ఆ తర్వాత వేలం ప్రక్రియ చేపడతారు.