అమెరికాలో రూ.కోటి జాబ్ వదులుకుని 32 లక్షలకు బెంగళూరు రావొచ్చా? NRI ప్రశ్నకు సోషల్ మీడియా షాక్..!

అమెరికాలో $150,000 (దాదాపు కోటి రూపాయల పైన) జీతం సంపాదిస్తున్న ఒక భారతీయ ఉద్యోగి.. భారతదేశానికి తిరిగి వచ్చి బెంగళూరు (Bengaluru) లో రూ.32 లక్షల యాన్యువల్ ప్యాకేజీతో పనిచేయడం సరైన నిర్ణయమేనా? అని రెడిట్ (Reddit) వేదికగా అడిగిన ప్రశ్న ప్రస్తుతం ఆన్‌లైన్‌ లో పెద్ద చర్చకు దారితీసింది.

అమెరికాలో పని చేస్తూ 15 ఏళ్ల అనుభవం ఉన్న ఒక ఉద్యోగి రెడిట్ వేదికగా ఒక ప్రశ్న అడిగాడు. "నేను ఒక్కడినే ఇంట్లో సంపాదించే వ్యక్తిని, కుటుంబంలో ముగ్గురం ఉన్నాం. బెంగళూరులో రూ.32 లక్షలు vs అమెరికాలో 1,50,000 డాలర్లు ? వీటిలో ఏది బెటర్?" అని అడిగారు. అయితే ఈ పోస్ట్, కేవలం జీతం లెక్కల గురించి కాకుండా, క్వాలిటీ లైఫ్, ట్యాక్స్, కెరీర్ డెవలప్ మెంట్ వంటి పలు అంశాలపై విస్తృత చర్చకు తెరతీసింది.

నెంబర్స్ వర్సెస్ నైపుణ్యం

రెడిట్(Reddit) యూజర్ల నుంచి వచ్చిన స్పందనలు ప్రధానంగా మూడు రకాలుగా ఉన్నాయి.. అవేంటంటే..

1. జీతం తక్కువే!

చాలా మంది నెటిజన్లు రూ.32 లక్షల ఆఫర్‌పై ఆశ్చర్యం వ్యక్తం చేశారు. 15 ఏళ్ల అనుభవం ఉన్న ఒక సీనియర్ ప్రొఫెషనల్‌కు బెంగళూరు(Bengaluru)లో రూ.32 లక్షలు సరైన జీతం కాదని చాలా మంది గట్టిగా వాదించారు. "₹32 లక్షలు vs $150K పోలికలో బెంగళూరు ఆఫర్ చాలా తక్కువ. 15 సంవత్సరాల అనుభవానికి రూ.80 లక్షల వరకు మార్కెట్ జీతం ఉంటుంది. అంతకంటే తక్కువకు తిరిగి రావడం సరైనది కాదు" అని మరి కొందరు సూచించారు.

2. అమెరికాలో ఉండటం బెస్ట్!

మరికొందరు నేరుగా అంకెలను మాత్రమే చూస్తూ, "అమెరికానే బెస్ట్. 150,000 డాలర్ల ముందు ఇండియాలో ఏదీ సరిపోదు" అని స్పష్టం చేశారు.

3. ప్రాంతాన్ని బట్టి ఖర్చు

ఇకపోతే మరి కొంతమంది నెటిజన్లు మాత్రం కేవలం అంకెలను కాకుండా ఆ ఉద్యోగి అమెరికాలో నివసిస్తున్న ప్రాంతాన్ని బట్టి విశ్లేషణ చేశారు. ఒకవేళ మీరు అమెరికాలోని బే ఏరియా (Bay Area) వంటి ఖరీదైన నగరంలో ఉంటే ముగ్గురి కుటుంబానికి $150,000 కూడా సరిపోకపోవచ్చు అని అన్నారు. ఇంకొక యూజర్ "నేను భారతదేశంలో కోటి రూపాయలకు పైగా జీతం సంపాదించేవాడిని. తర్వాత $150,000 జీతంతో అమెరికాలోని ఓ చిన్న నగరానికి వెళ్లాను. ఇప్పుడు చాలా సంతోషంగా ఉన్నాను. మంచి సేవలు, ప్రశాంతమైన జీవితం దొరకనప్పుడు డబ్బు ఎంత ఉన్నా వృథానే." అని వ్యక్తిగత అనుభవాన్ని పంచుకున్నారు.

తుది నిర్ణయం దేనిపై ఆధారపడి ఉంటుంది?

ఈ విశ్లేషణ మొత్తాన్ని పరిశీలిస్తే, ₹32 లక్షలు vs $150K పోలిక కేవలం ఆర్థికం కాదు. ఒకవేళ ఆ ఉద్యోగి ప్రధాన లక్ష్యం డబ్బు ఆదా చేయడమైతే.. $150,000 జీతమే మెరుగైనది. రూ.32 లక్షల జీతంతో బెంగళూరు(Bengaluru)లో ఉంటే ముగ్గురి కుటుంబానికి అయ్యే ఖర్చులు తీసివేస్తే, పొదుపు చాలా తగ్గుతుంది. అలాగే టెక్సాస్‌ వంటి ప్రశాంతమైన నగరాల్లో ఉండే క్వాలిటీ లైఫ్, ప్రశాంతత బెంగళూరులో ఉండకపోవచ్చు. కాబట్టి నిర్ణయం అనేది వ్యక్తిగత ప్రధాన్యతలపై ఆధారపడి ఉంటుంది.