సొమ్ము కాజేస్తారు

అలాంటి సైబర్ నేరగాళ్లను నమ్మి మీ వివరాలు ఇస్తే కష్టపడి సంపాదించిన మీ సొమ్మును దొంగిలిస్తారని హెచ్చరిస్తున్నారు. ఆదాయపు పన్ను శాఖ నుంచి ఇలాంటి వివరాలు కోరుతూ సందేశాలు లేదా ఈ-మెయిల్స్ రావను గుర్తుంచుకోవాలని సూచించింది. మారుతున్న హైటెక్ ప్రపంచంలో అందుకు అనుగుణంగా నేరగాళ్లు కొత్త కొత్త దార్లు వెతుకుతున్నారు.

ఫేక్ సందేశాల పట్ల జాగ్రత్త

ఐటీ శాఖ పంపిస్తున్నట్లుగా ఫేక్ సందేశాల పట్ల జాగ్రత్త వహించాలని, ట్యాక్స్ రీఫండ్ ప్రక్రియలో భాగంగా మేము మీ డెబిట్, క్రెడిట్ కార్డు, సీవీసీ నెంబర్లు అడగమని, మీ కార్డు వివరాలు ఎవరితోను పంచుకోవద్దని ఐటీ శాఖ సోషల్ మీడియా ద్వారా హెచ్చరికలు జారీ చేసింది.

నమ్మి వివరాలు అందిస్తే..

ట్యాక్స్ రీఫండ్ కోసం కొంతమంది వాటిని నమ్మి వివరాలు అందిస్తే మీ డబ్బు పోతుందని హెచ్చరించారు. రీఫండ్ ప్రక్రియ కోసం కేవలం బ్యాంకు వివరాలు ఉంటే చాలునని, డెబిట్ కార్డు వివరాలు అవసరం లేదని, ఇలాంటి నకిలీ సందేశాలు నమ్మవద్దని సూచించింది.

ట్యాక్స్ రీఫండ్ ఫ్రాడ్ సందేశం

అమాయక ట్యాక్స్ పేయర్స్‌ను బుట్టలో పడేసేందుకు నమ్మదగిన విధంగా సైబర్ నేరగాళ్లు ప్రవర్తిస్తారు. ఐటీ రిటర్న్స్‌ను లాస్ట్ తేదీలోగా దాఖలు చేయాలని ముందుగా నమ్మబలుకుతారు. ఐటీఆర్ రీఫండ్ క్లెయిమ్ చేసుకోమని సందేశాలు కూడా వస్తాయి. ఈ ఈ-మెయిల్స్, సందేశాలు మిమ్మల్ని మెప్పించేలా ఉంటాయి. వాటితో పాటు కింద లింక్ ఉంటుంది. ఆ లింక్ పైన క్లిక్ చేయమని ఉంటుంది.

కొత్త వెబ్ సైట్‌కు వెళ్లి వివరాలు అడుగుతుంది

మీరు ఆ లింక్ పైన క్లిక్ చేస్తే ఓ కొత్త వెబ్ సైట్‌కు వెళ్తుంది. అందులో మీ నుంచి వివరాలు కోరుతూ ఓ ఫారమ్ ఉంటుంది. బ్యాంకు అకౌంట్ వివరాలతో పాటు ఆధార్ కార్డు నెంబర్, మీ పాన్ కార్డు నెంబర్ అడుగుతారు. కానీ ఇవి మీ సీక్రెట్ వివరాలు. ఈ వివరాలు మీరు ఎవరికి కూడా అందించవద్దు. ఎందుకంటే ఐటీ రిటర్న్స్ రీఫండ్ చేస్తామనే సాకుతో సైబర్ నేరగాళ్లు మీ బ్యాంకులోని డబ్బును గుల్ల చేస్తారు.

ఇతరులకు విక్రయించే అవకాశం

మీ రహస్య సమాచారం ఇస్తే మీరు నష్టపోతారు. అంతేకాదు, దానిని ఇతరులకు అమ్మివేయవచ్చు కూడా. ఆ తర్వాత ఇతర సైబర్ నేరగాళ్లు మిమ్మల్ని లక్ష్యంగా చేసుకోవచ్చు. కాబట్టి అలర్ట్‌గా ఉండాలి.

అలాంటి వారికి దూరంగా ఉండండి..

నిపుణుల అభిప్రాయం మేరకు... ఐటీఆర్ రీఫండ్ గురించి ఆందోళన చెందేవారు, సోషల్ మీడియాలో సంబంధిత సమాచారం గురించి పదేపదే వెతికేవారు తదితరులు ఎక్కువగా ఇలాంటి ఫేక్ అలర్ట్స్‌కు పడిపోయే అవకాశాలు ఉన్నాయి.

ఎస్సెమ్మెస్‌లు, ఈమెయిల్స్ ద్వారా మీ వివరాలు అడిగితే మీరు అనుమానించాల్సిందే. మీ పర్సనల్ వివరాలను ఫోన్ కాల్స్ లేదా మెసేజ్‌లు లేదా ఈ మెయిల్స్ ద్వారా అడిగేది కేవలం ఫ్రాడ్ చేసేవాళ్లే. ఐటీ డిపార్టుమెంట్ మాత్రం అలాంటి పర్సనల్ వివరాలు అడగదు. మీకు ఏమైనా అనుమానం ఉంటే మీ బ్యాంకులో లేదా ట్యాక్స్ అథారిటీలను అడగండి. మీకు రీఫండ్ అవుతుందని లేదా మీ బ్యాంకు అకౌంట్ వివరాలు అడిగే వారికి దూరంగా ఉండండి.