న్యూఢిల్లీ: చాక్లెట్ అంటే చిన్నవారికే కాదు ఎంతోమంది పెద్దవారికి కూడా ఇష్టమే. నాణ్యత, రుచి ఆధారంగా ఎక్కువ ధర పెట్టి కొనుగోలు చేస్తారు చాలామంది. ఓ చాక్లెట్ ధర రూ.1 నుంచి వెయ్యి అంతకంటే కాస్త అటు ఇటుగా చూసి ఉంటారేమో. కానీ ఐటీసీ తయారు చేసిన చాక్లెట్ ధర తెలిస్తే షాకవుతారు. ఇది ప్రపంచంలోనే అత్యంత ఖరీదైన చాక్లెట్‌ను తయారు చేసింది.

ఈ కంపెనీకి చెందిన ఫాబెల్లె బ్రాండ్... ట్రినిటీ-ట్రఫుల్స్ ఎక్స్‌ట్రార్డినేర్ పేరితో ఓ చాక్లెట్‌ను రూపొందించింది. దీని ధర కిలోకు రూ.4.3 లక్షలు. ఇంతటి ఖరీదైన చాక్లెట్ మరొకటి లేదు. కాబట్టి గిన్నిస్ బుక్‌లో ఈ లిమిటెడ్ ఎడిషన్‌ స్థానం సంపాదించినట్లు కంపెనీ ఒక ప్రకటనలో తెలిపింది. చేతిలో సరిపడే ఒక్కో చెక్క పెట్టెలో 15 ట్రఫుల్స్ ఉండగా సగటు బరువు దాదాపు 15 గ్రాములు.

ప్రపంచంలోనే ఇప్పటి వరకు అత్యంత ఖరీదైన చాక్లెట్ ఇది. ఈ ఘనతతో గిన్నిస్ బుక్‌లోకి ఎక్కింది. ఐటీసీ ప్రతినిధులు దీనిని మంగళవారం ఆవిష్కరించారు. భారత్‌లోనే కాకుండా అంతర్జాతీయ స్థాయిలో రికార్డు సృష్టించినందుకు సంతోషంగా ఉందని ఐటీసీ ఫుడ్ డివిజన్ చీఫ్ ఆపరేటింగ్ ఆఫీసర్ అనుజ్‌ రుస్తోగీ తెలిపారు.