దీపావళి వస్తున్నవేళ

సాధారణంగా దీపావళికి ముందు వారాల్లో కరెన్సీ వినియోగం పెరుగుతుంది. ఈ పండగ సందర్భంగా వినియోగం పుంజుకుంటుంది. వినియోగదారులు అనేక రకాల ఉత్పత్తులు కొనుగోలు చేస్తుంటారు. ఈ సందర్భంగా అనేక మంది నగదు రూపంలోనే చెల్లింపులు చేస్తుంటారు. ఈసారి దీపావళి కొన్ని రాష్ట్రాల్లో ఎన్నికల సందర్భంగా వస్తోంది. కాబట్టి కొనుగోళ్లు, నగదు వినియోగం మరింత ఎక్కువగా ఉంటుందని భావిస్తున్నారు.

పీఎంసీ బ్యాంక్ ప్రభావం

పంజాబ్, మహారాష్త్ర కో ఆపరేటివ్ బ్యాంకు (పీఎంసీ ) సంక్షోభం నేపథ్యంలో బ్యాంకు ఖాతాదారుల్లో ఆందోళనలు పెరిగిపోయాయి. విశ్వాసం సన్నగిల్లింది. పీఎంసీ ఖాతాదారులు తమ ఖాతాల నుంచి తీసుకునే నగదుపై ఆంక్షలు విధించారు. ఈ నేపథ్యంలో ఇతర బ్యాంకుల ఖాతాదారులు కాస్త అప్రమత్తమై తమ నగదును బ్యాంకుల నుంచి తీసుకోవడం మొదలు పెట్టారు. దీంతో నగదు చెలామణి పెరిగే అవకాశం ఏర్పడిందని పరిశీలకులు అంటున్నారు.

అయినా తక్కువేనట...

రూ.500, రూ.1,000 రద్దుకన్నా పూర్వం దేశ జీడీపీలో చలామణిలో ఉన్న కరెన్సీ 11.6 శాతం ఉండేది. ఇప్పుడు కరెన్సీ చలామణి పెరిగిపోయినప్పటికీ పెద్ద నోట్ల రద్దుకన్నా ముందు ఉన్న స్థాయికన్నా తక్కువ స్థాయిలోనే ఉన్నట్టు భారత రిజర్వ్ బ్యాంకు అధికారవర్గాలు చెబుతున్నాయి.

వచ్చే ఏడాది తగ్గుతుంది...

ప్రస్తుతం కరెన్సీ వినియోగం ఎక్కువ ఉన్నప్పటికీ వచ్చే ఏడాదిలో తగ్గడానికి అవకాశం ఉందని బ్యాంకర్లు భావిస్తున్నారు. ప్రస్తుతం జాతీయ రహదారులపై టోల్ వసూళ్లు నగదు రూపంలో జరుగుతున్నాయి. అయితే ఈ వసూళ్లను క్రమంగా ఎలక్ట్రానిక్ చెల్లింపులలోకి మార్చుతున్నారు. దీని వల్ల నగదు వినియోగం మరింతగా తగ్గుతుందని బ్యాంకర్లు అంటున్నారు.