భారీ పన్ను పోటు...

మన దేశంలో వ్యక్తిగత ఆదాయ పన్ను రేట్లు అధికం. రూ 2.5 లక్షల వరకు ఆదాయానికి పన్ను మినహాయింపు ఉంది. రూ 5 లక్షల లోపు ఆదాయంపై 5% పన్ను పడుతుంది. కానీ రూ 5 లక్షల నుంచి రూ 10 లక్షల ఆదాయంపై 20% ... ఆ పైన ఆదాయంపై 30% పన్ను విధింపు ఉంటుంది. ఇటీవలి కాలంలో ఇండియాలో కూడా వేతనాలు భారీగా పెరిగాయి. మిడ్ మానేజ్మెంట్ లెవెల్ ఉద్యోగుల వేతనాలు సగటున ఏడాదికి రూ 10 లక్షల నుంచి రూ 12 లక్షలుగా ఉంటోంది. అదే బహుళ జాతి కంపెనీల్లో పనిచేసే జనరల్ మేనేజర్ అంతకంటే అధిక హోదా కలిగిన వారి వేతనం రూ 25 లక్షలు.. అంతకంటే అధికంగా ఉంటోంది. దీంతో వీరు 30% పన్ను పరిధిలోకి వచ్చేస్తున్నారు. అన్ని రకాల మినహాయింపుల తర్వాత కూడా వీరు అధిక పన్ను స్లాబులో ఉంటున్నారు. దీంతో వీరితోటి ఉద్యోగుల తో పోల్చితే చేతికి అందే మొత్తం పెద్దగా అధికంగా ఏమి ఉండటం లేదు. కింది స్థాయి ఉద్యోగుల పన్ను రేటు తక్కువగా ఉండటంతో తేడా తగ్గిపోతోంది.

ఖర్చులు అధికం...

హోదా కు తగ్గట్లు జీవన శైలి కూడా మారుతుంది. దాంతో అవసరానికి మించిన వ్యయాలు చేయల్సీ వస్తుందని ఫైనాన్సియల్ మేనేజర్స్ చెబుతున్నారు. తొలుత ఇంటి అద్దె రూపంలో వారికీ భారీ ఖర్చు మొదలవుతుంది. సాధారణంగా రెండు గదుల అద్దె ఇల్లు సరిపోతే, పై హోదా వల్ల మూడు గదుల ఇళ్ళకు మారాల్సి వస్తుంది. దీంతో 50% ఇంటి అద్దె పెరుగుతుంది. మరో వైపు ఉండే ప్రాంతం కూడా అప్గ్రేడ్ కావాల్సి వస్తుంది. దీంతో అద్దెలు మరింతగా పెరుగుతాయి. ఫర్నిచర్, హోమ్ అప్లయెన్సెస్, దుస్తులు, పెర్ఫ్యూమ్, ఫుడ్ వంటి అన్ని విషయాల్లోనో ఖర్చులు పెరిగిపోతాయి. దీంతో పొదుపు చేయటంపై ప్రభావం పడుతుంది. క్రెడిట్ కార్డుల వినియోగం భారీగా పెరుగుతుంది. అనవసరమైన వాటిని కూడా కొంటారు. నాకు నెలకు రూ 5 లక్షల వేతనం అని మా ఆవిడకు తెలుసు. కానీ దానిపై ఎంత ఆదయ పన్ను చెల్లించాలో తనకు తెలియదు. అందుకే, ప్రతి కొనుగోలు లోనూ ఆమె భారీగా ఖర్చు పెట్టెలా చేస్తుంది. మొహమాటం కొద్దీ నేను కూడా కాదనలేక పోతున్న. అందుకే క్రెడిట్ కార్డుల పై ఎక్కువగా ఆధారపడుతున్న అని ఒక యానిమేషన్ కంపెనీ లో వర్టికల్ హెడ్డుగా పనిచేస్తున్న రణవీర్ వాపోయారు.

పెద్ద ఇంటి కొనుగోలు...

సాధారణంగా జీత భత్యాలు, ఆదయ మార్గాలను బట్టి మనం కొనుగోలు చేయబోయే ఇంటి విలువ, దానికోసం తీసుకొనే రుణాన్ని అంచనా వేస్తాం. కానీ భారీ వేతన జీవులు రూ 1 కోటి విలువ ఉండే మూడు పడక గదుల అపార్ట్మెంట్ కంటే, రూ 2.5 కోట్ల విలువ చేసే విల్లా ను కొనుగోలు చేసేందుకు ఆసక్తి చూపుతారు. కారణం ఏమిటంటే... ఒకవైపు ఇంట్లో వారిని తృప్తిపరచటం, మరో వైపు మిగతా వారికి ఏమాత్రం తీసిపోవట్లేలేదనే భావన కోసం కూడా శక్తికి మించి ఖర్చు చేస్తున్నారు. దీంతో, ఆదయ పన్ను మినహాయింపుల ప్రయోజనం కూడా వీరికి పెద్దగా కలిసి రాదు. ఇంటి కొనుగోలు కోసం తీసుకొనే ఋణం భారీగా పెరిగిపోతోంది.

రిస్కీ పెట్టుబడులు...

ఎదుటివారిని చూసి తమకు అనుభవం లేని స్టాక్ మార్కెట్లు, బిట్ కాయిన్ లు వంటి రిస్కీ పెట్టుబడులకు కూడా అధిక వేతనం ఉన్న వారు మొగ్గు చూపుతారని ఫైనాన్సియల్ సేవలు అందించే శ్రీనివాస్ రావు పేర్కొంటున్నారు. అనుభవ లేమి కారణంగా మార్కెట్లు పెరుగుతున్నపుడు అధికంగా పెట్టుబడి పెట్టి, వాటి పట్నంలో భయానికి లోనై షేర్లు అమ్మేస్తారని, తద్వారా పెద్ద మొత్తంలో నష్టపోతారని విశ్లేషించారు. ఇది అందరికీ వర్తించక పోయిన... ఎక్కువ మంది ఇలాగే ఇబ్బంది పడుతున్నారని చెప్పారు.

మొహమాటం...

తమ హోదా పెద్దది కావటం తో తమకు తెలియని విషయాలను ఇతరుల నుంచి తెలుసుకొనేందుకు వీరు మొహమాట పడుతున్నారని పలువురు ఆర్థిక రంగ నిపుణులు వెల్లడించారు. దీంతో సరైన నిర్ణయాలు తీసుకోవటంలో తడబాటుకు గురి అవుతున్నారని చెబుతున్నారు. అలాగే, ఎక్కడైనా ఆర్థికంగా నష్టపోయినప్పుడు కూడా వీరు కుటుంబ సభ్యులకు గానీ.... మిత్రులకు గానీ వెల్లడించటం లేదన్నారు. మొహమాటం కారణంగానే సీనియర్ మేనేజర్స్ అధికంగా ఇలా నష్టపోతున్నారని విశ్లేషించారు. సో, దీన్ని బట్టి చూస్తే... ఎక్కువ వేతనం ఉండగానే బాగా సంపాదిస్తున్నట్లు కాదు అని తేలిపోతోంది. అందుకే, ఇప్పటికైనా ఇలాంటి వారు నిపుణులు ఐన వారి నుంచి సరైన సలహాలు స్వీకరించి క్రమ పద్దతిలో పెట్టుబడులు, పొదుపు చేయాలనీ, ఆర్థికంగా మెరుగ్గా స్థిరపడాలని సూచిస్తున్నారు.