వచ్చే ఏడాది (2020) ఏప్రిల్ నుంచి బీఎస్ 6 ఇంధనం వాహనాలు ప్రజలకు అందుబాటులోకి వస్తాయని కేంద్రమంత్రి ప్రకాశ్ జవదేకర్ చెప్పారు. బీఎస్ 6 ప్రమాణాలతో వాహనాలు, బీఎస్ 6 ఇంధనం అందుబాటులో ఉంటుందని తెలిపారు. దీని వల్ల 80 నుంచి 90 శాతం వరకు కాలుష్యం తగ్గుతుందని చెప్పారు. నేషనల్ క్లీన్ ఎయిర్ క్యాంపెయిన్ కింద 122 పట్టణాలలో కాలుష్యం తగ్గించేందుకు ప్రణాళికలు సిద్ధం చేసినట్లు తెలిపారు.

ప్రభుత్వం ఇందుకు సంబంధించి నిధులు కూడా విడుదల చేసిందన్నారు. ఇందుకోసం రూ.60,000 కోట్ల నిధులను ఇన్వెస్ట్ చేస్తున్నట్లు తెలిపారు. కాలుష్యం తగ్గించేందుకు కృషి చేస్తున్న కంపెనీలను ప్రభుత్వం పర్యవేక్షిస్తోందని చెప్పారు. ప్రకాశ్ జవదేకర్ దసరా పర్వదినం సందర్భంగా మంగళవారం జైపూర్‌లోని మాలవియా నేషనల్ ఇనిస్టిట్యూట్ ఆఫ్ టెక్నాలజీలో మొక్కలు నాటే కార్యక్రమంలో పాల్గొని, ప్రసంగించారు.

కాగా, గత ఏడాది అక్టోబర్ 24వ తేదీన సుప్రీం కోర్టు ఏప్రిల్ 1, 2020 నుంచి దేశవ్యాప్తంగా బీఎస్ 6 ప్రమాణాలతో కూడిన వాహనాలు విక్రయించాలని ఆదేశాలు జారీ చేసింది. అలాగే, బీఎస్ 4 వాహనాలు ఏప్రిల్ 1వ తేదీ నుంచి విక్రయించరాదని ఆదేశించింది.