శుభవార్త: స్మార్ట్‌గా గంటలోనే రిటైల్ రుణాలు

ముంబై: ఆన్‌లైన్ ద్వారా లోన్ కోసం దరఖాస్తు చేసుకున్న గంటలో... ఇంకా చెప్పాలంటే 59 నిమిషాల వ్యవధిలోనే రుణాలు అందించే PSB లోన్స్ ఇన్ 59 మినట్స్ (PSB loans in 59 minutes) పోర్టల్ ద్వారా రిటైల్ రుణాల అనుమతుల ప్రక్రియకు బ్యాంకులు గురువారం శ్రీకారం చుట్టాయి.

MSMC రుణాలు మాత్రమే అందుబాటులో ఉన్న ఈ పోర్టల్ ద్వారా హోమ్, పర్సనల్, రుణాలు కూడా అందించడం ప్రారంభమైంది. త్వరలో ఆటో రుణాలనూ అందుబాటులోకి తీసుకురానున్నారు. దేశంలోని వివిధ ప్రభుత్వ రంగ బ్యాంకులు ఈ పోర్టల్ ద్వారా కేవలం గంట (59 నిమిషాలు) వ్యవధిలోనే రుణాలకు సూత్రప్రాయమైన అనుమతులొస్తాయి.

ఈ పోర్టల్ ఆదాయపుపన్ను రిటర్న్స్, బ్యాంకు ఖాతాల ద్వారా డేటాను అత్యాధునిక గణాంకాల విధానంలో త్వరితంగా విశ్లేషిస్తుంది. దరఖాస్తును అప్‌లోడ్ చేయగానే ఇందులోని ఆల్గారిథమ్స్ సమగ్రంగా విశ్లేషించి ఆ వ్యక్తి ఎంత మొత్తంలో రుణం పొందడానికి అర్హుడో తెలియజేస్తుంది. ఈ ఇన్‌స్టాంట్ లోన్‌తో ఉన్నచోటు నుంచి కదలాల్సిన అవసరం లేదు. స్మార్ట్ ఫోన్ ద్వారానే చేసుకోవచ్చు.

ఈ ప్రక్రియ ద్వారా రుణ మంజూరును వేగవంతం చేయడంతో పాటు బ్యాంకర్లు, కస్టమర్ల సమయాన్ని ఆదా చేయడానికి ఉపయోగపడుతుంది. ఇతర రుణాలను కూడా ఇందులోకి ప్రవేశపెడితే బ్యాంకుల రిటైల్ వ్యాపార విస్తరణకు ఉపయోగపడుతుందని, అలాగే ట్రాన్సాక్షన్ కాస్ట్ కూడా తగ్గుతుందని భావిస్తున్నారు.