న్యూఢిల్లీ: భారత నిరుద్యోగం ఆగస్ట్ నెలలో 8.4 శాతంతో మూడేళ్ల గరిష్టానికి చేరుకుందని CMIE (సెంటర్ ఫర్ మానిటరింగ్ ఇండియన్ ఎకానమీ) వెల్లడించింది. ఆగస్ట్ 2019లో వీక్లీ అన్‌ఎంప్లాయిమెంట్ గ్రోత్ 8 నుంచి 9 శాతం మధ్య ఉంది. అదే సమయంలో జూలై నెలలో ఇది 7-8 శాతం మధ్య ఉంది. ఈ మేరకు బుధవారం రిపోర్ట్‌లో వెల్లడించింది. 2016 సెప్టెంబర్ తర్వాత ఇంత నిరుద్యోగ శాతం కలిగి ఉండటం ఇదే మొదటిసారి అని వెల్లడించింది.

CMIE నివేదిక ప్రకారం అర్బన్‌లో నిరుద్యోగం శాతం 9.6గా ఉండగా, గ్రామీణ ప్రాంతాల్లో 7.8 శాతంగా ఉంది. 2018 ఆగస్ట్ నెలతో పోలిస్తే ఈ ఆగస్ట్ నెలలో 2 శాతం పెరిగింది. గ్రామీణ భారతంలో సంవత్సరానికి ఉపాధి వృద్ధి 2019 ఆగస్టులో 2.9 శాతంగా ఉండగా, పట్టణ భారతదేశంలో 0.2 శాతం క్షీణించింది.

నిరుద్యోగత పెరగడానికి లేబర్ పార్టిసిపేషన్ రేట్ కూడా ఓ కారణం. 2018 అక్టోబర్ నెలలో ఇది 42.46 శాతంగా ఉండగా 2019 ఆగస్ట్ నాటికి 43.35 శాతంగా ఉంది. కార్మిక భాగస్వామ్య రేటు పెరుగుదల ఆరోగ్యకరమైన సందేశమని, ఉద్యోగాలు పొందగలరని చెప్పేందుకు నిదర్శనంగా నిలుస్తుందని పేర్కొంది.

ఇప్పటికే గత కొన్నాళ్లుగా ఆటో సేల్స్ తగ్గడంతో వెహికిల్ మేకింగ్ కంపెనీలు తాత్కాలికంగా తమ ప్లాంట్లను మూసివేశాయి. డీలర్లు షాప్స్ క్లోజ్ చేసారు. వేలాది మందిని ఉద్యోగాల నుంచి తీసివేశారు. దీంతో ఎంతోమంది రోడ్డున పడ్డారు. మరోవైపు ఎఫ్ఎంసీజీ రంగంలోను వృద్ధి మందగించింది. రియాల్టీ రంగం ఆశించిన మేర పుంజుకోలేదు.