వినియోగం, పెట్టుబడుల దెబ్బ

మనం అనుకుంటాం కానీ ఆర్థిక వ్యవస్థలో ఒకదానితో ఒకదానికి లింకు ఉంటుంది. ఏ మాత్రం తేడా జరిగినా ఈ లింక్ గల్లంతు అవుతుంది. ఉదాహరణకు... బిస్కెట్ల విషయానికి వస్తే బిస్కెట్లకు అవసరమైన ముడిసరుకులను సేకరించి ఉత్పత్తి చేసి వినియోగదారులకు అందించాల్సి ఉంటుంది. వినియోగదారుడు కొనుగోలు చేయకపోతే మొత్తం ఈ ప్రక్రియ దెబ్బతింటుంది. ఇప్పుడు వినియోగదారు అనేక రకాల ఉత్పత్తులను కొనుగోలు చేయడానికి ఆలోచిస్తున్నారు. తమకు వస్తున్నా ఆదాయాన్ని ఆచితూచి ఖర్చు చేస్తున్నారు. అందుకే వినియోగం తగ్గి పోతోంది. దీని వల్ల కంపెనీలు గగ్గోలు పెడుతున్నాయి. వినియోగం లేకపోతే కంపెనీలు కొత్త ఉత్పత్తులు తీసుకురావడానికి వెనుకాడుతాయి. విస్తరణను నిలిపివేస్తాయి. కొత్త ఉద్యోగాల కల్పనా ఉండదు. ఉద్యోగం లేకపోతే ఆదాయం ఉండదు. ఆదాయం లేకపోతే కొనుగోళ్లు ఉండవు. ఇలా ఒకదానితో ఒకదానికి లింక్ ఉంటుంది. ప్రస్తుతం మన దేశంలో వినియోగం బాగా తగ్గిపోయింది. అదేవిధంగా ప్రయివేట్ పెట్టుబడులు కూడా తక్కువగా ఉన్నాయి. వీటి ప్రభావం ఆర్ధిక వ్యవస్థలోని రంగాలపై కనిపిస్తోంది.

జీడీపీ వృద్ధి అంత అవసరమా ?

జీడీపీ లో వృద్ధి అంత అవసరమా.. ప్రభుత్వం, విశ్లేషకులు పదే పదే జీడీపీ గురించి వల్లే వేస్తున్నారు అని చాలా మంది అనుకుంటారు. అన్ని రంగాల్లో ఉత్పత్తి పెరిగితేనే జీడీపీ పెరుగు తుంది. ఒక శాతం జీడీపీ పెరిగితే లక్ష మందికి ఉపాధి లభిస్తుంది. వారి వల్ల మరికొందరికి పరోక్షంగా ఉపాధి దొరుకుతుంది. అందుకే జీడీపీ వృద్ధికి ప్రాధాన్యం.

ఆర్బీఐ, ప్రభుత్వం చర్యలు..

దేశ జీడీపీ లో వృద్ధి రేటును పెంచడానికి అటు భారత రిజర్వ్ బ్యాంకు ఇటు ప్రభుత్వం అనేక రకాల చర్యలు తీసుకుంటున్నాయి. ఆర్బీఐ తన వంతుగా వరుసగా నాలుగు సార్లు రెపోరేటును తగ్గించింది. రెపోరేటు తగ్గింపు వల్ల బ్యాంకులు తమ రుణాలపై వడ్డీరేట్లను తగ్గిస్తున్నాయి. దీనితో రుణాలు తీసుకునే వారు పెరుగుతున్నారు. రుణం తీసుకున్నవారు దేనికో ఒకదానికి ఖర్చు చేస్తారు. దానివల్ల సంబంధిత రంగంలో కార్యకలాపాలు పెరిగి ఆ రంగం వృద్ధికి, ఉపాధి కల్పనకు దోహదపడుతుంది. దీన్ని దృష్టిలో ఉంచుకొనే ఆర్బీఐ చర్యలు తీసుకుంటుంది.

ఇక ప్రభుత్వం విషయానికి వస్తే ఆర్థిక వ్యవస్థలోని అన్ని రంగాలు వృద్ధి చెందేలా చర్యలు తీసుకోవడం ప్రభుత్వం భాద్యత. అందుకే ఆయా రంగాల్లో పెట్టుబడులు పెడుతుంది. కొత్త పెట్టుబడులు వచ్చేలా చర్యలు తీసుకుంటుంది. వినియోగవృద్దికి ప్రాధాన్యం ఇస్తుంది. పెట్టుబడులకు అవసరమైన సొమ్మును సమీకరించుకుంటుంది.

ఆర్బీఐ నుంచి రూ. 1.76 లక్షల కోట్లు

ప్రభుత్వం ఆశిస్తున్నట్టుగానే ఆర్బీఐ నుంచి రూ.1.76 లక్షల కోట్లు అందుతున్నాయి. ఈ మొత్తాన్ని సక్రంగా వినియోగించుకుంటే ఆర్ధిక వ్యవస్థలో మంచి వృద్ధి రేటు నమోదయ్యే అవకాశం ఉంటుందని విశ్లేషకులు చెబుతున్నారు. ఈ సొమ్మును ద్రవ్యలోటు కట్టడికి, రుణ భారాన్ని తగ్గించుకోవడానికి, పెట్టుబడి వ్యయాలకు ప్రభుత్వం వినియోగించుకోవచ్చని అంటున్నారు.

నిబంధనలు సరళతరం

దేశ జీడీపీలో మంచి వృద్ధిరేటు నమోదు అయితే విదేశీ పెట్టుబడుల రాక కూడా పెరిగే అవకాశం ఉంటుంది. విదేశీ పెట్టుబడులను ఆకర్షించడానికి ప్రభుత్వం ఇటీవలే పలు రంగాలకు సంభందించిన నిబంధనలను సరళతరం చేసిన విషయం తెలిసిందే. విదేశీ పెట్టుబడులు వస్తే దేశీయ స్టాక్ మార్కెట్ పెరగడానికి,పెరగడానికి, రూపాయి బలోపితం కావడానికి అవకాశం ఉంటుంది.