భారత జీడీపీ వృద్ధి రేటు 2019 సంవత్సరంలో 6.2 శాతంగా మూడీస్ ఇన్వెస్టర్స్ సర్వీస్ అంచనా వేసింది. ఈ మేరకు శుక్రవారం నాడు ఇందుకు సంబంధించిన వివరాలు వెల్లడించింది. బలహీనమైన నియామకాలు, గ్రామీణ భారతంలో ఆర్థిక ఒత్తిడి, కఠినమైన ఆర్థిక పరిస్థితుల నేపథ్యంలో జీడీపీ అంచనాను గతంలోని 6.8 శాతం నుంచి 6.2 శాతానికి సవరించింది. 2020లో 6.7 శాతంగా అంచనా వేసింది. ఇందులో 0.6 శాతం కోతను విధించింది.

ఆటోరంగంలో ఆర్థిక మందగమనం, ఎఫ్ఎంసీజీ సంక్షోభం, నియామకాలు తగ్గడం, ఉద్యోగాలు కోల్పోతున్న నేపథ్యంలో ప్రస్తుత పరిస్థితుల తర్వాత మూడీస్ 2019కి సంబంధించి వృద్ధి రేటును 6.2 శాతానికి తగ్గించింది. స్థిరమైన ప్రభుత్వ, ప్రయివేటు కన్సప్షన్ ఉన్నప్పటికీ బలహీనమైన వాణిజ్యం, పెట్టుబడుల ఒత్తిడి అంశాలు జీడీపీపై పడతాయని తెలిపింది.

బాహ్య ఒత్తిళ్లను పక్కన పెడితే, బలహనమైన నియామకాలు, గ్రామీణంలో ఆర్థిక ఇబ్బందులు, ఎన్‌బీఎఫ్‌సీ రంగంలో ఒత్తిడి కారణంగా కఠినమైన ఫైనాన్సింగ్ పరిస్థితులు వంటి అంశాల కలియిక కారణంగా భారత ఆర్థిక వ్యవస్థ మందగించిందని తెలిపింది. ప్రపంచ ఆర్థిక వ్యవస్థ బలహీనపడటంతో ఏసియా ఎక్స్‌పోర్ట్స్ తగ్గాయని, ప్రపంచ మార్కెట్లలో నెలకొన్న అనిశ్చితులు పెట్టుబడులపై ప్రభావం చూపిస్తున్నాయని పేర్కొంది.

డొమెస్టిక్ ఫ్యాక్టర్స్ భారత వృద్ధి రేటుపై గణనీయంగా పడుతుందని మూడీస్ పేర్కొంది. బిజినెస్ సెంటిమెంట్ మోడరేషన్, కార్పోరేట్‌లకు స్లో క్రెడిట్ ప్రవాహం, దేశంలోని పెట్టుబడులు బలహీనపడటానికి కారణమయ్యాయని పేర్కొన్నారు. 2017లో భారత వృద్ధి రేటు 6.9 శాతం, 2018లో 7.8 శాతంగా మూడీస్ అంచనా వేసింది.

కాగా, ఇటీవలే మరో రేటింగ్ సంస్థ క్రిసిల్ కూడా భారత జీడీపీ వృద్ది అంచనాలను సవరించింది. అంతకుముందు 2019-20 ఆర్థిక సంవత్సరంలో 7.1శాతం వృద్ధిరేటు నమోదయ్యే అవకాశాలున్నాయని క్రిసిల్ అంచనా వేసింది. ఆ తర్వాత దానిని 6.9 శాతానికి తగ్గించింది.