పది రాష్ట్రాల జాబితాలో నిలిచింది

ఎగుమతుల రంగంలో తెలంగాణ చాలా వేగంగా వృద్ధి సాధిస్తోందని జయేష్ రంజన్ అన్నారు. 2017-18 ఆర్థిక సంవత్సరంలో రూ.1.56 లక్షల కోట్ల ఎగుమతులతో దేశంలోని మొదటి 10 రాష్ట్రాల జాబితాలో నిలిచిందని చెప్పారు. మరింత వృద్ధి సాధించేందుకు సమగ్ర వ్యూహాన్ని రూపొందిస్తున్నామని చెప్పారు. కేంద్రం రాయితీలన్ని సద్వినియోగం చేసుకునే దిశగా కార్యాచరణ చేపడతామన్నారు.

వీటికి మంచి డిమాండ్

పారిశ్రామిక పురోగమనానికి ఎగుమతులు కీలకమని, రాష్ట్ర ప్రభుత్వం దీనికి అత్యంత ప్రాధాన్యమిస్తోందని చెప్పారు. ఎగుమతుల వృద్ధిలో ఐటీ రంగం అగ్రస్థానంలో ఉందని, గత ఏడాది రూ.1.05లక్షల కోట్ల మేర ఎగుమతులు ఉన్నాయన్నారు. ఇతర ఉత్పత్తుల సేల్స్ రూ.51వేల కోట్ల మేర ఉన్నాయన్నారు. అమెరికా, బ్రిటన్, యూరప్ దేశాలకు ఎగుమతులు లాభదాయకంగా ఉన్నాయని, ఐటీ, ఔషధ, వైమానిక, ఇంజినీరింగ్, గ్రానైట్, చేనేత, జౌళి, హస్తకళలు వంటి వాటికి మంచి డిమాండ్‌ ఉందన్నారు.

7.38 బిలియన్ డాలర్ల ఉత్పత్తుల ఎగుమతి

దేశంలో ఎగుమతులు చేస్తున్న రాష్ట్రాల్లో టాప్ 5 స్థానానికి చేరాలన్నది తెలంగాణ లక్ష్యమన్నారు. తెలంగాణలో మరో అయిదేళ్లలో ఎగుమతులు రెట్టింపు అవుతాయన్నారు. 2018-19 ఆర్థిక సంవత్సరంలో తెలంగాణ నుంచి 7.38 బిలియన్ డాలర్ల విలువైన ఉత్పత్తులు ఎగుమతి అయ్యాయన్నారు. గత ఆర్థిక సంవత్సరంలో 10 శాతం వృద్ధి నమోదు అయిందన్నారు.