ఆదాయపన్నులో అదనంగా రూ.1.5 లక్షల తగ్గింపు

రూ.45 లక్షలు లోపు గృహరుణాలపై రూ.3.5లక్షలు వడ్డీ రాయితీ ఇస్తున్నట్లు కేంద్ర ఆర్థికమంత్రి నిర్మలా సీతారామన్ బడ్జెట్ సందర్భంగా ప్రకటించారు. వడ్డీ రాయితీ రూ.2 లక్షల నుంచి రూ.3.50 లక్షలకు పెంచుతున్నట్లు తెలిపారు. అంటే రూ.1.5 అదనంగా పెరిగింది. గృహ రుణాలపై ఆదాయ పన్నులో అదనంగా రూ.1.5 లక్షలు డిడక్షన్ ఎంతోమందికి ఊరట. హౌసింగ్ సెక్టార్‌ను ప్రోత్సహించేందుకు, అందరికీ ఇల్లు లక్ష్యానికి ఇది బూస్ట్.

2020 మార్చి 31 వరకే...

ఆదాయపన్ను చట్టంలోని సెక్షన్ 24(b) కింద అనుమతించిన రూ.2 లక్షల పన్ను మినహాయింపును రూ.3.5 లక్షలకు పెంచుతున్నామని నిర్మలా సీతారామన్ పేర్కొన్నారు. అయితే, ఇది మార్చి 31, 2020 వరకు మాత్రమే వర్తిస్తుంది. అలాగే, ఇంటి విలువ రూ.45 లక్షలకు మించరాదు.

మరింత ఊపందుకోనున్న రంగం..

ఇప్పటికే గత మధ్యంతర బడ్జెట్‌లో జీఎస్టీని భారీగా తగ్గించడంతో రియల్ ఎస్టేట్ రంగం, నిర్మాణ రంగం ఊపందుకుంది. అన్ని నగరాల్లో ఇళ్ల కొనుగోళ్లు పెరిగాయి. ఇప్పుడు ఆదాయ పన్ను విషయంలో మరోసారి మధ్యతరగతి వారికి మంచి మినహాయింపు ఇవ్వడంతో ఈ రంగం మరింత ఊపందుకోనుంది.