భారీగా నష్టాల్లో ఉండి బిచానా ఎత్తేసిన రిలయన్స్ ఇన్ఫోకాంను ఎవరూ కొనేందుకు ముందుకు రాలేదు. సంస్థ దివాలా తీయడంతో ఎవరూ సంస్థను కొనేందుకు ముందుకు రాలేదు . రిలయన్స్‌కు సంబంధించిన స్పెక్ట్రమ్‌ను వేలం ద్వారా కొనుగోలు చేసి కేంద్ర టెలికాంశాఖకు బకాయిలు చెల్లించి ఆ తర్వాత కొన్న సంస్థే వినియోగించుకోవచ్చని రిలయన్స్ ప్రతినిధులు తెలిపారు. రిలయన్స్‌ ఇన్ఫోకాంకు సంబంధించి అన్ని కేబుల్స్ ఇతర సామగ్రి టవర్లను కూడా అమ్మకానికి పెట్టే యోచనలో యాజమాన్యం ఉంది.టెలికాంశాఖతో ఇకపై న్యాయపరమైన పోరాటం కోరుకోవట్లేదని యాజమాన్యం వెల్లడించింది. రానున్న వేలం పాటలో స్పెక్ట్రమ్ కొనుగోలు చేసిన టెలికాం సంస్థకు దీని వాలిడిటీ 20 ఏళ్లు ఉంటుందని రిలయన్స్ యాజమాన్యం స్పష్టం చేసింది

ఆర్‌కాం వైర్‌లైస్‌ ఆస్తుల్లో 4జీ స్పెక్ట్రమ్, 43వేల టెలికాం టవర్లను కూడా వేలం వేయనుంది. వేలం పాట ద్వారా వచ్చే డబ్బులతో అప్పులు కట్టాలని యోచనలో రిలయన్స్ ఉంది.ఇప్పటి వరకు కేంద్రానికి బకాయిలు చెల్లించనందున రిలయన్స్ ఆర్‌కాం సంస్థ స్పెక్ట్రమ్‌ కేటాయింపులను కేంద్ర టెలికాంశాఖకు అప్పగించేలా ఆదేశాలు ఇవ్వాలని నేషనల్ కంపెనీ లా ట్రైబ్యునల్‌లో టెలికాం శాఖ వాదనలు వినిపించింది. స్పెక్ట్రమ్ ప్రభుత్వం అధీనంలో ఉంటాయని 20ఏళ్ల వరకు మాత్రమే లీజుకు ఇవ్వడం జరుగుతుందని పేర్కొంది. ఆ స్పెక్ట్రమ్‌ను అమ్మలేరని వెల్లడించింది.

టెలికాం కంపెనీలు స్పెక్ట్రమ్ వేలంలో పాల్గొనచ్చని అయితే ముందుగా రిలయన్స్ ఇన్ఫోకాంకు సంబంధించిన బకాయిలను చెల్లించాల్సి ఉంటుందని టెలికాంశాఖ తెలిపింది. జియో ఇన్ఫో కాంకు తొలుత తన స్పెక్ట్రమ్‌ను అమ్మాలని రిలయన్స్ ఆర్‌కాం ప్రయత్నించినప్పటికీ... పాత బకాయిలు కూడా చెల్లించాలని చెప్పడంతో రేసు నుంచి జియో పక్కకు తప్పుకుంది. ఆ సమయంలో మొత్తం రూ.7300 కోట్లు చెల్లించాల్సి వచ్చింది.