ఉద్యోగులకు గుడ్ న్యూస్

8.55 శాతం నుంచి 8.65కి పెంచిన వడ్డీ రేటును స్థిరపరచాలని EPFO తెలిపింది. దీంతో సుమారు 4.5 కోట్ల మంది ఈపీఎఫ్ సబ్‌స్క్రైబర్లకు లబ్ధి చేకూరుతుందని అంచనా. వడ్డీ రేటును పెంచినప్పటికీ సంస్థ వద్ద మిగులు రూ.150 కోట్లు ఉంటుందని చెబుతున్నారు. వడ్డీ రేటు పెంపు సందర్భాల్లో ఆర్థిక శాఖ.. సమీక్షించాలని కోరడం సాధారణమేనని చెబుతున్నారు. 190 బిలియన్ డాలర్ల ఆస్తులకు పైగా నిర్వహిస్తున్న ఈపీఎఫ్ఓ, రూ.5.75 బిలియన్లను ఐఎల్ అండ్ ఎఫ్ఎస్ బాండ్లలో ఇన్వెస్ట్ చేసిందని చెబుతున్నారు. అయితే ఇది 0.1 శాతం కంటే తక్కువ.

ఏం జరిగింది?

పీఎఫ్ అకౌంట్ పైన అందించే వడ్డీ రేటు పెంపు నిర్ణయానికి ఆర్థిక మంత్రిత్వ శాఖ ఆసక్తిగా లేదని వార్తలు వచ్చాయి. వడ్డీ రేటు నిర్ణయాన్ని మరోసారి సమీక్షించుకోవాలని ఆర్థిక శాఖ కూడా ఈపీఎఫ్ఓను కోరిందని మీడియాలో వచ్చింది. సార్వత్రిక ఎన్నికలకు ముందు వడ్డీ శాతాన్ని పెంచుతూ నిర్ణయం తీసుకుంది. ద్రవ్యోల్భణం, డిపాజిట్లు సమీకరించడం కష్టమవుతుందనే బ్యాంకుల ఆందోళన వంటి పలు కారణాలతో ఆర్థిక శాఖ సమీక్ష కోరిందని తెలుస్తోంది. అయితే ఈపీఎఫ్ఓ ప్రకటన పీఎఫ్ సబ్‌స్క్రైబర్లకు భారీ ఊరట.

బ్యాంకుల ఆందోళన.. అయినా ఉద్యోగుల వైపే మొగ్గు

EPFO బోర్డు పీఎఫ్ ఖాతాపై వడ్డీ రేటును కొద్ది నెలల క్రితం పెంచింది. బ్యాంకులు రుణాలపై వడ్డీ రేట్లు తగ్గించడం వల్ల డిపాజిట్లపై వడ్డీ రేట్లు పెంచలేకపోతున్నాయి. పీపీఎఫ్ లాంటి చిన్న మొత్తాల పొదుపు పథకాలపై ఇచ్చే వడ్డీ రేట్లను తగ్గించాలని బ్యాంకులు కోరాయి. చిన్న మొత్తాల పొదుపు పథకాలపై ఇచ్చే వడ్డీ రేటు ఎక్కువగా ఉండటం మరోవైపు, బ్యాంకుల్లో డిపాజిట్లపై వడ్డీ తక్కువగా ఉండటంతో బ్యాంకులకు నిధుల సమీకరణ కష్టమవుతోంది. అందుకే వడ్డీ తగ్గించాలని బ్యాంకులు ఒత్తిడి చేశాయి. అయినప్పటికీ వడ్డీ రేటు పెంచుతూ తీసుకున్న నిర్ణయంపై ఈపీఎఫ్ఓ తగ్గలేదు.