రిలయన్స్ జియో, ఎయిర్‌టెల్, బీఎస్ఎన్ఎల్‌లకు ధీటుగా ఎదుర్కొనేందుకు వొడాఫోన్ మరో కొత్త ప్లాన్‌తో ముందుకు వచ్చింది. రూ.299 కొత్త అన్‌లిమిటెడ్ ప్లాన్‌ను ఆఫర్ చేస్తోంది. ఈ సరికొత్త ఆఫర్ ఇతర టెలికం సర్వీస్ ప్రొవైడర్లకు ధీటుగా భావిస్తున్నారు.

రూ.299 అన్‌లిమిటెడ్ ప్లాన్ ఆఫర్ ద్వారా యూజర్‌కు 70 రోజుల వ్యాలిడిటీ ఉంటుంది. అపరిమిత వాయిస్ కాల్స్, 4G/ 3Gతో 3GB డేటా, 1,000 ఎస్సెమ్మెస్‌లు అందిస్తోంది. ఇక్కడ యూజర్ ఓ విషయం గుర్తుంచుకోవాలి. ఎస్సెమ్మెస్‌లు, డేటా 70 రోజులకు అని తెలుసుకోవాలి.

ప్రతి రోజు 3GB, వెయ్యి ఎస్సెమ్మెస్‌లకు అనుమతి లేదు. 70 రోజులకు ఇవి వర్తిస్తాయి. వాయిస్ కాల్స్ మాత్రం ఉచితం. ప్రస్తుతం ఈ ఆఫర్ ముంబై టెలికం సర్కిల్ పరిధిలో అమలులో ఉంది. పంజాబ్, గుజరాత్ టెలికం సర్కిల్స్‌లలోను అందుబాటులో ఉంది.

ఇటీవల జియో క్రికెట్ సీజన్ స్పెషల్ డేటా ప్యాక్ పేరుతో ఎగ్జిస్టింగ్ కస్టమర్లకు, కొత్త కస్టమర్లకు సరికొత్త ఆఫర్ తీసుకు వచ్చింది. ఈ ప్యాక్‌లో రూ.251తో 51 రోజుల పాటు 102GB డేటా ఆఫర్ చేస్తోంది. జియో దెబ్బకు ఇటీవల వొడాఫోన్ ఐడియా, ఎయిర్‌టెల్ కస్టమర్లు తగ్గిపోతోన్న విషయం తెలిసిందే.