న్యూఢిల్లీ: సాధారణంగా ప్రతి ఏడాది జూలై 31వ తేదీలోపు ఐటీ రిటర్న్స్ ఫైల్ చేయాల్సి ఉంటుంది. కానీ ఈసారి (2018-19 ఆర్థిక సంవత్సరానికి గాను) సీబీడీటీ ఫాం 16 ఇష్యూ తేదీని పెంచడంతో పాటు ఐటీఆర్ ఫైలింగ్ తేదీని కూడా పొడిగించనుంది.

ఇప్పటికే ఎంప్లాయర్ (యజమాని/కంపెనీ)ఇవ్వాల్సిన ఫాం తేదీని పొడిగించింది. ఈ మేరకు సీబీడీటీ 4 మే 2019న ఆదేశాలు జారీ చేసింది. టీడీఎస్ రిటర్న్స్ (ఫాం24క్యూ) తేదీని 31 మే 2019 నుంచి 30 జూన్ 2019 వరకు పొడిగిస్తున్నట్లు ప్రకటించింది. అలాగే ఫాం 16 డ్యూ డేట్‌ను కూడా 15 జూన్ 2019 నుంచి 10 జూలై 2019కి పెంచారు.

ఇంతకుముందు ఫాం 24క్యూ ఫైల్ చేయాల్సిన చివరి తేదీ మే 31. ఇప్పుడు దీనిని జూన్ 30వ తేదీ వరకు పొడిగించారు. ఇంతకుముందు ఈ మినహాయింపు ఒడిశాకు ఇచ్చారు. ఇప్పుడు దేశమంతటికీ వర్తిస్తుంది.

అదే సమయంలో ఎంప్లాయర్స్ (యజమాని) తమ ఉద్యోగులకు ప్రొవైడ్ చేయాల్సిన ఫాం 16 తేదీని జూన్ 15వ తేదీ నుంచి జూలై 10వ తేదీకి పొడిగించింది. దీంతో ఇండివిడ్యువల్స్ ఫాం 16 ఫైలింగ్ తేదిని కూడా పొడిగించే అవకాశముంది.

ఎంప్లాయర్ జూలై 10వ తేదీన ఫాం 16 ఇస్తే కనుక ఐటీఆర్ ఫైల్ చేసేందుకు ఉద్యోగులకు తక్కువ సమయం ఉంటుంది. జూలై 31వ తేదీలోపు ఫైల్ చేయాలంటే.... కేవలం 21 రోజులు మాత్రమే మిగిలి ఉంటుంది. కాబట్టి పొడిగించే అవకాశాలు ఉన్నాయని భావిస్తున్నారు.