టెలికాం రంగంలో విపరీతమైన పోటీతో.. ఉపయోగం లేని సబ్‌స్కైబర్లను ఏ టెలికాం సంస్థా అక్కున చేర్చుకోవడం లేదు. నెలనెలా కనీస రీఛార్జ్ కూడా చేయించని కస్టమర్లను మెల్లిగా వదిలించుకోవడానికే ఇష్టపడ్తున్నాయి. దీంతో మార్చి నెలలో ఏకంగా 2.2 కోట్ల కనెక్షన్లను కట్ చేశాయి కంపెనీలు. ట్రాయ్ చెబ్తున్న లెక్కల ప్రకారం కనెక్షన్ల సంఖ్య మార్చిలో 118 కోట్లు ఉండగా.. అది ఏప్రిల్‌లో 116 కోట్లకు తగ్గింది. నెలవారీ పద్ధతిలో చూస్తే 1.85 శాతం క్షీణత నమోదైంది.

కనీస ఆదాయమే లక్ష్యం
కోట్లకు కోట్ల సబ్‌స్క్రైబర్లు ఉండి ప్రయోజనం లేదని, వారి నుంచి ఆదాయం వస్తేనే లాభమని సంస్థలు నిర్ధారణకు వచ్చాయి. యావరేజ్ రెవెన్యూ పర్ యూనిట్ (ARPU)ను పెంచుకునేందుకు సంస్థలు తీవ్రంగా కసరత్తు చేస్తున్నాయి. జియో దెబ్బకు ఈ మధ్యకాలంలో వొడాఫోన్-ఐడియా సంస్థలు 3.5 కోట్ల కనెక్షన్లను కోల్పోయింది. ఆదాయాన్ని పెంచుకోవడమే లక్ష్యంగా ప్యాకేజీల్లో కూడా అనేక మార్పులను చేసింది ఎయిర్టెల్.