తీవ్ర ఆర్థిక సంక్షోభంలో కూరుకుపోయిన జెట్ ఎయిర్వేస్ పరిస్థితి దారుణంగా ఉంది. ఈ విమానయాన సంస్థ గురువారం 14 విమానాలతో సేవలు అందించింది. తాజాగా, శుక్రవారం కేవలం తొమ్మిది విమానాలను మాత్రమే నడిపిస్తోంది. శుక్రవారం జెట్‌ ఎయిర్వేస్‌కు చెందిన తొమ్మిది విమాన సర్వీసులే నడుస్తున్నాయని చెబుతున్నారు. వీటిలో రెండు బోయింగ్ 737, ఏడు ప్రాంతీయ జెట్‌ ఏటీఆర్‌లు ఉన్నాయి.

తాజా పరిణామాలపై కేంద్రమంత్రి సురేష్ ప్రభు స్పందించారు. జెట్‌ ఎయిర్వేస్ పరిస్థితులను సమీక్షించాలని ఆదేశాలు జారీ చేశారు. ఈ విమానయాన సమస్యపై సమీక్ష జరపాలని విమానయాన శాఖ కార్యదర్శి ప్రదీప్ సింగ్ ఖరోలాను ఆదేశించామని, ప్రయాణికుల అసౌకర్యాన్ని తగ్గించి వారికి సరైన భద్రత కల్పించేలా తగిన చర్యలు తీసుకోవాలని సూచించామని సురేష్ ప్రభు సోషల్ మీడియా వేదికగా ట్వీట్ చేశారు.

జెట్ ఎయిర్వేస్ 120 విమాయాన సర్వీసుల నుంచి ఇప్పుడు కేవలం 9 విమానాలు నడిపే పరిస్థితికి వెళ్లింది. అన్ని ఇంటర్నేషనల్ ఫ్లైట్స్ రద్దు చేసింది. కాగా, ఆర్థిక ఇబ్బందుల్లో కూరుకుపోయిన జెట్‌ ఎయిర్వేస్‌ ఇప్పటికే పలు అంతర్జాతీయ మార్గాల్లో సర్వీసులను నిలిపివేసింది. దీంతో ప్రయాణికులు ఇబ్బందులకు గురవుతున్నారు. మరోపక్క టికెట్‌ కొనుగోలు చేసిన ప్రయాణికులకు జెట్‌ దాదాపు రూ.3,500 కోట్లు చెల్లించాల్సి ఉందని చెబుతున్నారు.