దేశ సర్వోన్నత న్యాయస్థానం రిజర్వ్ బ్యాంక్ ఆఫ్ ఇండియాకు నోటీసులు పంపింది. కొన్ని బ్యాంకులకు సంబంధించిన వివరాలు వెల్లడి చేయాలంటూ ఓ వ్యక్తి సమాచార చట్టం కింద ఆర్బీఐకి దరఖాస్తు చేసుకున్నాడు. అయితే వివరాలు ఇప్పటి వరకు ఇవ్వలేదని వ్యక్తి సుప్రీంకోర్టును ఆశ్రయించాడు. పిటిషన్‌ను విచారణకు స్వీకరించిన జస్టిస్ నాగేశ్వరరావు నేతృత్వంలోని ధర్మాసనం ఆర్బీఐపై ఆగ్రహం వ్యక్తం చేసింది.

ఓ వ్యక్తి సమాచార చట్టం కింద తనకు కావాల్సిన సమాచారం పొందాలని దరఖాస్తు చేసుకుంటే సమాచారం ఇవ్వాలని కోర్టు పేర్కొంది. బ్యాంకింగ్ నిబంధనలను తుంగలో తొక్కి అడ్డగోలుగా రుణాలు ఇచ్చిందని అసలు రుణాలు ఎలా మంజూరు చేశారు ఏప్రాతిపదికన మంజూరు చేశారో నివేదిక ఇవ్వాలంటూ ముంబైకి చెందిన గిరీష్ మిట్టల్ ఆర్బీఐకి దరఖాస్తు చేసుకున్నాడు. అయితే ఆర్బీఐ కానీ నాటి గవర్నర్ ఊర్జిత్ పటేల్ కానీ సమాచారం ఇచ్చేందుకు నిరాకరించారు. దీంతో గిరీష్ మిట్టల్ సుప్రీంకోర్టులో పిటిషన్ దాఖలు చేశాడు.

పిటిషన్‌ను విచారణ చేసిన సుప్రీంకోర్టు సమాచారం నిరాకరణ కిందికే వస్తుందని అభిప్రాయపడుతూ... నాలుగు వారాల్లోగా కౌంటర్ అఫిడవిట్ దాఖలు చేయాలని మార్చిలో మళ్లీ కేసును విచారణ చేస్తామని పేర్కొంది. అంతేకాదు ఆర్బీఐ ఎలాంటి సమాచారం దాయటానికి వీలు లేదని సుప్రీంకోర్టు స్పష్టం చేసింది.