మోటార్ సైకిళ్లపై సగానికి సగం సుంకం తగ్గించేందుకు భారత్ నిర్ణయించడాన్ని స్వాగతిస్తున్నట్లు అమెరికా అధ్యక్షుడు ట్రంప్ అన్నారు. అదేసమయంలో మద్యంపై అధిక సుంకం విధించడాన్ని తప్పుబట్టారు ట్రంప్. వాణిజ్య చట్టంపై వైట్ హౌజ్‌లో మాట్లాడిన ట్రంప్ ఈ వ్యాఖ్యలు చేశారు.

మోటార్ సైకిల్ పై భారత్‌లో 100శాతం సుంకం విధించేవారు. కేవలం 50శాతం పన్ను మాత్రమే విధించేలా చర్చలు జరిపి భారత్‌ను ఒప్పించగలిగానని అదికూడా రెండు నిమిషాలు మాత్రమే చర్చలు జరిపామని వెల్లడించారు. ఇక వైన్స్ పై అధిక సుంకం విధించడాన్ని మాత్రం ట్రంప్ తప్పుబట్టారు. మద్యంపై భారత్‌కు 150శాతం అధికంగా సుంకం విధిస్తోందని అదే అమెరికాలో మాత్రం ఏ సుంకం ఉండదని ట్రంప్ అన్నారు.

గతేడాది దిగుమతి చేసుకుంటున్న మోటార్‌సైకిళ్లపై భారత్ 50శాతం సుంకాన్ని తగ్గించింది. ముఖ్యంగా హార్లీ డేవిడ్సన్ లాంటి బైకులపై అధిక సుంకాన్ని తగ్గించింది. అమెరికా దిగుమతి చేసుకునే భారత బైకులపై అధిక సుంకం విధిస్తామని ట్రంప్ హెచ్చరించడంతో భారత్ అమెరికా మోటార్ సైకిళ్లపై సుంకాన్ని తగ్గించింది. పరస్పర వాణిజ్య చట్టం మరొక దేశానికి సంబంధించిన వస్తువుల ధరపై ఒకరికొకరు సహకరించుకునే పరిస్థితి వస్తుందని ట్రంప్ చెప్పారు.

ఎవరికీ అవగాహన లేకుండా అమెరికా నుంచి ఎగుమతి అవుతున్న వస్తువులపై ఇష్టం వచ్చినట్లు పన్నులు సుంకాలు విధిస్తున్నారని ట్రంప్ మండిపడ్డారు. అదే సమయంలో వారు మాత్రం కొన్ని నిబంధనలు విధించుకున్నారు. కొన్ని దేశాలు అమెరికా ఉత్పత్తులను విక్రయించేందుకు అనుమతి ఇవ్వడం లేదని ట్రంప్ ఆరోపించారు. పరస్పర వాణిజ్య చట్టం అన్ని సమస్యలకు చెక్ పెడుతుందని ట్రంప్ అభిప్రాయపడ్డారు.