దావోస్: ఆర్థిక పరిమాణంలో చైనాను భారత్ క్రమంగా అధిగమించే దిశగా సాగుతోందని ఆర్బీఐ మాజీ గవర్నర్ రఘురామ్ రాజన్ అన్నారు. దావోస్‌లో జరుగుతున్న వరల్డ్ ఎకనామిక్ ఫోరమ్ వార్షిక సమావేశం 2019లో పాల్గొని ప్రసంగించారు. ఆయన స్ట్రాటెజిక్ అవుట్ లుక్ ఫర్ సౌత్ ఏషియా అనే అంశంపై మాట్లాడారు.

దక్షిణాసియా దేశాల్లో ఎకనామిక్ సైజ్ పరంగా చూస్తే క్రమంగా చైనాను భారత్ అధిగమించే అవకాశాలు కనిపిస్తున్నాయని చెప్పారు. చైనా వృద్ధిరేటు నెమ్మదిస్తున్నప్పటికీ, భారత వృద్ధి రేటు క్రమంగా పెరుగుతోందని చెప్పారు. రాబోయే కాలంలో ఆర్థిక వ్యవస్థ పరంగా భారత్ మంచి స్థానంలో నిలబడుతుందనే విశ్వాసం వ్యక్తం చేశారు.

ఈ రెండు దేశాల మధ్య పోటీ ఇరువురికీ ప్రయోజనం కలిగిస్తుందన్నారు. నేపాల్, పాకిస్తాన్ తదితర దేశాల్లో మౌలిక ప్రాజెక్టులపై చైనా పని చేస్తోందని, భవిష్యత్తులో భారత్ కూడా ఈ స్థాయికి చేరుతుందని ధీమా వ్యక్తం చేశారు. కాగా, 2017 ప్రపంచ బ్యాంకు విడుదల చేసిన డాటా ప్రకారం భారత్ ప్రపంచంలో ఆరో అతిపెద్ద ఆర్థిక వ్యవస్థగా ఉంది. భారత్ స్థూల దేశీయోత్పత్తి 2.59 లక్షలుగా ఉంది. చైనా జీడీపీ 12.23 లక్షల కోట్లతో ఉంది. అంటే మన దేశం కంటే నాలుగున్నర రెట్లు ఉంది.