వొడాఫోన్-ఐడియా విలీనం ద్వారా దేశంలో అతిపెద్ద టెలికామ్ సంస్థ ఆవిర్భవించేందుకు వేగంగా అడుగులు పడుతున్నాయి. దేశీయ టెలికామ్ పరిశ్రమ వర్గాల్లో ఎంతో ఆసక్తిని కలిగిస్తున్న ఈ విలీన ప్రతిపాదనకు ఐడియా సెల్యులార్ వాటాదారులు ఆమోదం తెలిపారు. ఈ నెల 12వ తేదీన జరిగిన సమావేశంలో 99 శాతం మందికి పైగా వాటాదారులు ఈ విలీనానికి ఆమోదం తెలిపారని ఆదిత్యా బిర్లా గ్రూపునకు చెందిన ఐడియా సెల్యులార్ సంస్థ శుక్రవారం స్టాక్ ఎక్స్‌చేంజీకి తెలియజేసింది. ఈ విలీనానికి అనుమతి ఇవ్వాలని కోరుతూ వొడాఫోన్ ఇండియా, ఐడియా సెల్యులార్ సంస్థలు ఇటీవల ఎన్‌సిఎల్‌టి (నేషనల్ కంపెనీ లా ట్రిబ్యునల్)ని ఆశ్రయించాయి. దీంతో ఎన్‌సిఎల్‌టి ఆదేశాల మేరకు ఐడియా సెల్యులార్ సంస్థ గురువారం తమ వాటాదారుల సమావేశాన్ని నిర్వహించి ఈ విలీన ప్రతిపాదనకు ఆమోదాన్ని పొందింది.

ఇక ఈ విలీనం కోసం వొడాఫోన్, ఐడియా సెల్యులార్ సంస్థలు డిఓటి (డిపార్ట్‌మెంట్ ఆఫ్ టెలికామ్) నుంచి తుది అనుమతి పొందాల్సి ఉంటుంది. ప్రస్తుతం దేశీయ టెలికామ్ మార్కెట్‌లో దాదాపు 35 శాతం వాటాను కలిగివున్న ఈ రెండు సంస్థలు తమ వ్యాపారాలను విలీనం చేసుకుని 2300 కోట్ల డాలర్ల విలువైన అతిపెద్ద సంస్థను సృష్టించాలని ఈ ఏడాది ఆరంభంలో అంగీకారానికి వచ్చిన విషయం విదితమే. ప్రపంచంలోని అతిపెద్ద టెలికామ్ మార్కెట్లలో రెండవదిగా ఉన్న భారత్‌లో ప్రస్తుతం భారతీ ఎయిర్‌టెల్ అగ్రస్థానంలో కొనసాగుతుండగా, వొడాఫోన్ ద్వితీయ స్థానంలోనూ, ఐడియా సెల్యులార్ తృతీయ స్థానంలోనూ ఉన్నాయి.