సామాజిక రంగంపై దృష్టి సారించ‌డంతో పాటు ప‌లు సంస్క‌ర‌ణ‌లు కొన‌సాగిస్తూ పోతే భార‌త్ వ‌చ్చే ప‌దేళ్ల‌లో జ‌పాన్‌,జ‌ర్మ‌నీల‌ను దాటేసి ప్ర‌పంచంలో మూడో అతిపెద్ద ఆర్థిక వ్య‌వ‌స్థ‌గా ఎదుగుతుంద‌ని బ్రిటీష్ బ్రోక‌రేజీ సంస్థ హెచ్ఎస్‌బీసీ చెప్పింది. "దేశంలో విద్య‌, ఆరోగ్యం వంటి అంశాల‌పై చేసే ఖ‌ర్చు చాలా త‌క్కువగా ఉంది. ఇది వ్య‌వ‌స్థ‌కు మంచిది కాదు... ఆయా రంగాల‌కు మ‌రింత మూల‌ధ‌నాన్ని స‌మ‌కూర్చుకోవాలి. ఆర్థిక వృద్దికి, రాజ‌కీయ స్థిర‌త్వానికి ఇది అస‌వ‌రం" అని హెచ్ఎస్‌బీసీ వెల్ల‌డించింది.

వ‌చ్చే ప‌దేళ్లలో భార‌త్ జ‌పాన్‌, జ‌ర్మ‌నీల‌ను తోసిరాజ‌ని డాల‌రు లెక్క‌ల్లో మూడో అతిపెద్ద ఆర్థిక వ్య‌వస్థ‌గా త‌యారుకాగ‌ల‌దు. అంతే కాకుండా కొనుగోలు శ‌క్తి ఆధారంగా చూస్తే చాలా తొంద‌ర‌గానే భార‌త్ శ‌క్తిమంత‌మైన దేశం అవుతుంద‌ని ఆర్థిక‌వేత్త‌లు పేర్కొన్నారు. 2028 నాటికి జ‌పాన్ 5 ట్రిలియ‌న్ డాల‌ర్ల ఆర్థిక వ్య‌వ‌స్థ‌గాను, జ‌ర్మ‌నీ 6 ట్రిలియ‌న్ డాల‌ర్ల వ‌ద్ద ఉంటే భార‌త్ మాత్రం 7 ట్రిలియ‌న్ డాల‌ర్ల మేరకు చేరుకోగ‌ల‌ద‌ని అంచ‌నాలు వెలువ‌రిస్తున్నాయి. ప్ర‌స్తుతం దేశ జీడీపీ 2.3 ట్రిలియ‌న్ డాల‌ర్ల వ‌ద్ద ఉంది. దీంతో అంత‌ర్జాతీయ ర్యాంకింగ్‌లో మ‌నం ఐదో స్థానంలో ఉన్నాం.