జులై 1న జీఎస్టీ అమ‌లు మొద‌లైంది. జీఎస్టీ రిట‌ర్నుల‌కు అంద‌రూ సిద్ద‌మ‌వ్వాల్సిన త‌రుణం ఇది. నిజానికి జులై నెల‌కు సంబంధించిన రిట‌ర్నులు దాఖ‌లు చేసేందుకు ఆగ‌స్టు 20తో గ‌డువు ముగియాల్సింది. అయితే అంద‌రూ రిట‌ర్నులు చేయ‌డంలో స‌హ‌క‌రించేందుకు గాను ప్ర‌భుత్వం జీఎస్టీ రిట‌ర్నులు(ఫారం-3బీ) స‌మ‌ర్పించేందుకు గ‌డువును ఆగ‌స్టు 25 వ‌ర‌కూ పెంచింది. ముఖ్యంగా జీఎస్టీ వెబ్‌సైట్‌లో సాంకేతిక లోపం త‌లెత్త‌డంతోనే రిట‌ర్నుల దాఖ‌లుకు గ‌డువును 5 రోజులు పెంచారు.

వ్యాపారులంతా తుడి గ‌డువు కోసం వేచిచూడ‌కుండా స‌త్వ‌ర‌మే జీఎస్టీ రిట‌ర్నుల‌ను దాఖ‌లు చేయాల‌ని ప్ర‌భుత్వం ఆదేశించింది. జ‌మ్మూ కాశ్మీర్లో జీఎస్టీ ఆర్డినెన్స్ తేవ‌డం ఆల‌స్యం అయింది క‌నుక గ‌డువు పెంచాల్సిందిగా కోరింది. మ‌రో వైపు కొన్ని రాష్ట్రాల్లో వ‌ర‌ద‌ల కార‌ణంగా వ్య‌వ‌స్థ‌లు స‌రిగా ప‌నిచేయ‌నందున వారికి రిట‌ర్నుల దాఖ‌లు గ‌డువుకు మ‌రింత స‌మ‌యం కావాల‌ని విన్న‌వించార‌ని ఆర్థిక శాఖ శ‌నివారం తెలిపింది. ఆఖ‌రు నిమిష‌యంలో ఎక్కువ మంది రిట‌ర్నులు చేసేందుకు సిద్ద‌మ‌వ‌డంతో సాంకేతిక స‌మ‌స్య‌లు తలెత్తాయ‌ని దీంతో గ‌డువును పెంచుతున్న‌ట్లుగా ఆర్థిక శాఖ వెల్ల‌డించింది.