ఒక ప‌క్క అప్పులు, మ‌రో ప‌క్క క్రెడిట్ రేటింగ్‌లు దిగ‌జారుతుండ‌టంతో రిల‌య‌న్స్ క‌మ్యూనికేష‌న్స్‌(ఆర్‌కామ్) ప‌రిస్థితి బ‌ల‌హీనంగా ఉంది. దీంతో రిలయన్స్ కమ్యూనికేషన్స్ (ఆర్‌కామ్) చైర్మన్ అనిల్ అంబానీ.. ప్రస్తుత ఆర్థిక సంవత్సరం (2017-18)లో వేతనంగానీ కమీషన్‌గానీ తీసుకోబోనని ప్రకటించారు.

సంస్థ పీకల్లోతు అప్పుల్లో కూరుకుపోవడం, క్రెడిట్ రేటింగ్ దిగజారిన నేపథ్యంలో అనిల్ ఈ నిర్ణయం తీసుకున్నారు. ఈ మేరకు బుధవారం ఆర్‌కామ్ ఓ ప్రకటనలో తెలియజేసింది. సంస్థ టాప్ మేనేజ్‌మెంట్ సైతం తమ వ్యక్తిగత జీతాన్ని తగ్గించుకుంటామని ప్రకటించింది. రుణాలిచ్చిన సంస్థలకు వాటిని తిరిగి చెల్లించడంలో రిలయన్స్ కమ్యూనికేషన్స్ విఫలమవుతున్నది తెలిసిందే. ఈ క్రమంలోనే ఈ ఏడాది డిసెంబర్ 31 వరకు గడువు కోరిన అనిల్ అంబానీ.. కొన్ని ఆస్తులను అమ్మి బకాయిలను చెల్లిస్తామని రుణదాతలకు హామీ ఇచ్చారు. ఇందుకు వారు అంగీకరించగా, మొత్తం 45,000 కోట్ల రూపాయల రుణాల్లో సెప్టెంబర్‌కల్లా 25,000 కోట్ల రూపాయల రుణాలను తీర్చేస్తామన్న ధీమాను అనిల్ కనబరిచారు.