షెల్(బోగ‌స్) కంపెనీల భ‌ర‌తం ప‌ట్టేందుకు మోడీ ప్ర‌భుత్వం సిద్ద‌మైంది. శ‌నివారం దేశ‌వ్యాప్తంగా 16 రాష్ట్రాల్లో 100 చోట్ల ఈడీ సోదాలు చేప‌ట్టింది. ఢిల్లీ, చెన్నై, కోల్‌క‌త‌, చంఢీగ‌డ్‌, ప‌ట్నా, రాంచి, అహ్మ‌దాబాద్, భువ‌నేశ్వ‌ర్‌, బెంగుళూరు ఈడీ జాబితాలో ఉన్నాయి. ఆయా ప్రాంతాల్లో 300 షెల్ సంస్థ‌లు ఉన్న చోట్ల వివిధ టీమ్‌ల ఆధ్వ‌ర్యంలో సోదాలకు వెళ్లిన‌ట్లు ఈడీ తెలిపింది.

మ‌నీ లాండ‌రింగ్‌, అక్ర‌మంగా జ‌రుపుతున్న విదేశీ క‌రెన్సీ లావాదేవీల‌ను త‌నిఖీ చేసేందుకు పీఎంఎల్ఏ, ఫెమా చ‌ట్టాల కింద ఈ చ‌ర్య‌కు దిగిన‌ట్లు నియంత్ర‌ణ సంస్థ వెల్ల‌డించింది. పీఎంవో ఆదేశాల మేర‌కు ప్ర‌భుత్వం ఏర్పాటు చేసిన స్పెష‌ల్ టాస్క్ ఫోర్స్ ఇచ్చిన ఆదేశాల మేర‌కే ఈ విధ‌మైన క‌ఠిన కార్యాచ‌ర‌ణ‌కు దిగిన‌ట్లు తెలుస్తోంది. గ‌త వారం రోజుల వ్య‌వ‌ధిలోనే ఇలాంటి బోగ‌స్ సంస్థ‌ల‌కు చెందిన కోట్లాది రూపాయ‌ల‌ను ఈడీ అటాచ్ చేసింది.