మొబైల్‌ టెలికం దిగ్గజాలు వొడాఫోన్‌- ఐడియా సెల్యులర్‌ విలీనం అధికారికంగా ఖరారయ్యింది. ఇందుకోసం ఆదిత్యా బిర్లా గ్రూప్, వోడాఫోన్ గ్రూప్‌లు త‌మ ఆమోదం తెలిపాయి. విలీనం త‌ర్వాత దేశంలోనే అత్య‌ధిక వినియోగ‌దారులు క‌లిగిన టెలికాం కంపెనీ ఏర్పాటు కానుంది. ప్ర‌స్తుతం వాడ‌కం దారుల సంఖ్య ప‌రంగా వోడాఫోన్‌, ఐడియా రెండు,మూడు స్థానాల్లో ఉండ‌గా ఎయిర్టెల్ ప్ర‌థ‌మ స్థానంలో ఉంది.

ఒక్కో షేర్‌కి రూ. 72 ధరలో వొడాఫోన్‌తో ఐడియా సెల్యులర్‌ విలీన డీల్‌ కుదిరినట్లు వెల్లడైంది. తద్వారా ప్రస్తుత ఐడియా ప్రమోటర్లు ఆదిత్య బిర్లా(ఏబీ) గ్రూప్‌నకు 21.1 శాతం వాటా లభించనుంది. దీనికి అదనంగా 4.9 శాతం వాటాను ప్రస్తుత ధర వద్ద ఏబీ గ్రూప్‌ మార్కెట్‌ నుంచి కొనుగోలు చేయనున్నట్లు తెలుస్తోంది. తద్వారా ఏబీ గ్రూప్‌ ప్రమోటర్ల వాటా విలీన సంస్థలో 26 శాతానికి చేరనుంది.
మొత్తానికి నూత‌న సంస్థ‌లో వాటాలు ఈ విధంగా ఉండ‌నున్నాయి. వోడాఫోన్ ఇండియా-45.1%, ఐడియా ప్ర‌మోటర్ల చేతిలో-26%; మిగిలిన 28.9% ప‌బ్లిక్ చేతిలో ఉంటుంది.