ప్రస్తుత ఆర్థిక సంవత్సరంలో భారత దేశ కరెంటు ఖాతా లోటు ఇంతకుముందు అంచనా వేసిన జిడిపిలో 0.4 శాతం నుంచి 1.4 శాతానికి పెరగొచ్చ‌ని అంతర్జాతీయ ఆర్థిక సేవల దిగ్గజం 'నోమురా' పేర్కొంది. నోట్ల రద్దు తర్వాత ఎగుమతులు బాగా తగ్గిపోవడంతో పాటుగా దిగుమతులు పెర‌గ‌డంతో నవంబర్ నెలలో భారత దేశ వాణిజ్య లోటు అక్టోబర్‌లో ఉన్న‌ 10.4 బిలియన్ డాలర్ల నుంచి 13 బిలియన్ డాలర్లకు పెరిగింద‌ని, ఇది 16 నెలల గరిష్ట‌మ‌ని జపాన్‌కు చెందిన ఆ సంస్థ వివ‌రించింది. ఫలితంగా ప్రస్తుత ఆర్థిక సంవత్సరంలో కరెంట్ ఖాతా లోటును ఇంతకు ముందు అంచనా వేసిన జిడిపిలో 0.4 శాతంనుంచి 1.4 శాతానికి సవరించినట్లు నోమురా ఒక పరిశోధనాపత్రంలో వెల్ల‌డించింది. ఈ సంవత్సరం నాలుగో త్రైమాసికం (అక్టోబర్-డిసెంబర్)లో కరెంటు ఖాతా లోటు ఇంతకు ముందు అంచనా వేసిన జిడిపిలో 0.9 శాతంనుంచి 2.5 శాతంగా ఉంటుందని, జనవరి-మార్చి త్రైమాసికంలో 2 శాతంగా ఉండొచ్చని నోమురా లెక్క‌గ‌ట్టింది.