ఒక ప‌క్క అన్ని బ్యాంకులు ఫిక్స్‌డ్ డిపాజిట్ల‌పైన వ‌డ్డీ రేట్ల‌ను త‌గ్గిస్తున్న క్ర‌మంలో సామాన్య మ‌దుప‌రికి కాస్త స్వాంత‌న చేకూర్చే వార్త ఇది. చిన్న మొత్తాల పొదుపు పథకాలపై ప్రస్తుత వడ్డీ రేట్లనే కొనసాగించాలని కేంద్ర ప్ర‌భుత్వం నిర్ణ‌యం తీసుకుంది. జనవరి - మార్చి త్రైమాసికానికి అంతకుముందు అమల్లో ఉన్న వడ్డీ రేట్లే కొనసాగుతాయని కేంద్ర ఆర్థిక శాఖ ప్ర‌క‌టించింది. పీపీఎఫ్, ఐదేళ్ల నేషనల్‌ సేవింగ్స్‌ సర్టిఫికెట్‌పై 8 శాతం వడ్డీ రేటు అమలవుతుంది. కిసాన్‌ వికాస పత్రపై రాబడులు 7.7 శాతంగా ఉంటాయని, 112 నెలలకు గడువు తీరతాయని ఆర్థిక శాఖ వెల్ల‌డించింది.

సుకన్య సమృద్ధి యోజన, ఐదేళ్ల సీనియర్‌ సిటిజన్స్‌ సేవింగ్స్‌ స్కీమ్‌పైనా అదే రేటును వ‌ర్తింప‌జేస్తారు. సేవింగ్స్‌ ఖాతా డిపాజిట్లపై 4 శాతం, 1-5 ఏళ్ల వరకు కాల వ్యవధి గల టర్మ్‌ డిపాజిట్లపై 7 నుంచి 7.8 శాతం, రికరింగ్‌ డిపాజిట్‌పై వడ్డీ రేటు 7.3 శాతం వడ్డీ రేటు వ‌ర్తిస్తుంది. కేంద్ర ప్రభుత్వ విధాన నిర్ణయం మేరకు... ప్రతీ త్రైమాసిక కాలానికి చిన్న మొత్తాల పొదుపు పథకాలపై వడ్డీ రేట్లను ప్రకటించాల్సి ఉంటుంది. ప్ర‌భుత్వ బాండ్ల‌పై రాబ‌డులు త‌గ్గుతున్న క్ర‌మంలో ఇంత‌కుముందు ఏడాదికొక‌సారి నిర్ణ‌యించే వ‌డ్డీ రేట్ల‌ను గ‌తేడాది నుంచి త్రైమాసికానికి ఒక‌సారి నిర్ణ‌యిస్తూ ఉన్నారు.