ఉద్యోగ భవిష్య నిధిపై వడ్డీ రేటును 2016-17 ఆర్థిక సంవ‌త్స‌రానికి 8.65 శాతంగా నిర్ణయించారు. ప్రస్తుతం ఉన్న 8.80 శాతం వ‌డ్డీలో 0.15 శాతం కోత విధించింది. కేంద్ర కార్మిక శాఖ ఆధ్వ‌ర్యంలో ప‌నిచేసే సెంట్రల్ బోర్డ్ ఆఫ్ ట్రస్టీ ఈమేరకు సోమవారం నిర్ణయం తీసుకుంది. 2015-16 ఆర్థిక సంవత్సరంలో భవిష్య నిధిపై వడ్డీ రేటును 8.8 శాతంగా నిర్ణయిస్తూ సెంట్రల్ బోర్డ్ ఆఫ్ ట్రస్టీ ఆమోదం కోసం కేంద్ర ఆర్థిక మంత్రిత్వ శాఖకు పంపింది. అయితే ఆర్థిక శాఖ దాన్ని 8.7 శాతానికి కుదించింది. అప్ప‌ట్లో కార్మిక సంఘాలు పెద్ద ఎత్తున నిర‌స‌న తెల‌ప‌డంతో ఆర్థిక శాఖ త‌న నిర్ణ‌యాన్ని వెన‌క్కు తీసుకుంది. దీంతో వెనక్కు తగ్గిన కేంద్రం సీబీటీ(సెంట్ర‌ల్ బోర్డ్ ఆఫ్ ట్ర‌స్టీ) నిర్ణయించిన 8.8 శాతాన్నే కొనసాగిస్తామని ప్రకటించింది. 2015- 16 ఆర్థిక సంవత్సరంలో ఈపీఎఫ్ ఆదాయం రూ.39,084 కోట్లగా అంచనా వేశారు. ఈపీఎఫ్ ఖాతాలకు 8.8 శాతం వడ్డీ చెల్లించడంతో రూ.383 కోట్ల లోటు ఏర్పడింది.

ఇది కూడా చ‌ద‌వండి ఈపీఎఫ్ బ్యాలెన్స్ చెక్ చేసుకోవ‌డం ఎలా?

ఇక పిపిఎఫ్‌పై గతంలో ఉన్న 8.1 శాతం వడ్డీని 8 శాతానికి, కిసాన్ వికాస్ పత్రాలపై 7.8 నుంచి 7.7 శాతానికి వడ్డీ తగ్గించారు. దీంతో కిసాన్ వికాస్ పత్రాల మెచ్యూరిటీ 110 నెలల నుంచి 112 నెలలకు పెరిగింది.