జులై-సెప్టెంబ‌రు త్రైమాసికంలో మ్యూచువ‌ల్ ఫండ్ ఆస్తులు 12% పెరిగి 16.11 ల‌క్ష‌ల కోట్ల రూపాయ‌ల‌కు పెరిగాయి. రిటైల్ పెట్టుబ‌డి దారులు బాగా పెట్టుబ‌డులు పెట్టేందుకు ఆస‌క్తి చూప‌డ‌మే ఇందుకు కార‌ణం. మొత్తం మ్యూచువ‌ల్ ఫండ్ రంగంలో 42 సంస్థ‌లు ప్ర‌ముఖంగా ఉన్నాయి. వాటి ఏయూఎమ్‌(అసెట్ అండర్ మేనేజ్‌మెంట్‌) సెప్టెంబ‌రు 30 నాటికి రూ. 16.11 ల‌క్ష‌ల కోట్ల‌కు చేరాయి. ఏప్రిల్‌-జూన్ త్రైమాసికం ముగిసే స‌మ‌యానికి ఈ ఆస్తుల విలువ రూ. 14.41 ల‌క్ష‌ల కోట్లుగా ఉన్నాయని యాంఫీ(అసోషియేష‌న్ ఆఫ్ మ్యూచువ‌ల్ ఫండ్ ఇండ‌స్ట్రీ) వెల్ల‌డించిన స‌మాచారం ద్వారా తెలుస్తోంది. మ్యూచువ‌ల్ ఫండ్ ప‌రిశ్ర‌మ‌లో టాప్ 5 కంపెనీలో ఐసీఐసీఐ ప్రుడెన్షియ‌ల్, హెచ్‌డీఎఫ్‌సీ, రిల‌య‌న్స్, బిర్లా స‌న్‌లైఫ్‌, ఎస్‌బీఐ అత్య‌ధిక ఆస్తుల‌ను క‌లిగి ఉన్నాయి.

మ్యూచువ‌ల్ ఫండ్ కంపెనీల‌కు రిటైల్ పెట్టుబ‌డిదారుల‌కు సిప్ స‌దుపాయాన్ని క‌ల్పిస్తున్నాయి. దీంతో క్ర‌మానుగ‌త పెట్టుబ‌డుల ద్వారా ఈక్విటీల్లో పెట్టే పెట్టుబ‌డుల సంఖ్య క్ర‌మంగా పెరుగుతోంది. సిప్‌(సిస్ట‌మ్యాటిక్ ఇన్వెస్ట్‌మెంట్ ప్లాన్) రూపంలో వారం, నెల‌, త్రైమాసికం ఇంట‌ర్వెల్స్‌లో పెట్టుబ‌డులు పెట్ట‌డానికి అవ‌కాశం ఉంటుంది. ప్ర‌స్తుతం మ్యూచువ‌ల్ ఫండ్ ఖాతాలు 5 కోట్ల‌ను దాటాయి. ఇందులో రిటైల్ వ‌ర్గానికి సంబందించిన‌వి దాదాపు 4 కోట్లు ఉంటాయ‌ని అంచ‌నా.