జూన్ నెల‌లో దేశీయ ఎగుమ‌తులు 1.27 శాతం పెరిగి 22.57 బిలియ‌న్ డాల‌ర్ల‌కు పెరిగాయి. 18 నెల‌ల త‌ర్వాత ఎగుమ‌తులు దేశ ఆర్థిక వ్య‌వ‌స్థ‌కు బ‌లాన్ని చేకూర్చ‌డం ఇదే. పెరుగుతున్న ఎగుమ‌తులు, త‌గ్గుతున్న దిగుమ‌తుల మూలంగా వాణిజ్య లోటు 8.11 బిలియ‌న్ డాల‌ర్ల‌కు త‌గ్గింది. గ‌తేడాది జూన్ నెల‌లో ఇది 10.8 బిలియ‌న్ డాల‌ర్లుగా ఉంది.

అంత‌ర్జాతీయ డిమాండ్ బ‌ల‌హీనంగా ఉండ‌టంతో పాటు, చ‌మురు ధ‌ర‌ల త‌గ్గుద‌ల మూలంగా 2014 డిసెంబ‌రు నుంచి ఎగుమ‌తుల వాటా త‌గ్గుతూ వ‌స్తోంది. వాణిజ్య‌, ప‌రిశ్ర‌మ‌ల శాఖ విడుద‌ల చేసిన గ‌ణాంకాల ప్ర‌కారం జూన్ నెల‌లో దిగుమ‌తులు 30.68 బిలియ‌న్ డాల‌ర్లుగా ఉన్నాయి. గ‌తేడాది ఇదే నెల‌లో ఉన్న 33.11 బిలియ‌న్ డాల‌ర్ల కంటే ఇవి 7.33 శాతం త‌క్కువ‌. పెట్రోలియం, ముడి చ‌మురు,సంబంధిత ఉత్ప‌త్తుల దిగుమ‌తులు 16.42 శాతం త‌గ్గుద‌ల న‌మోదు చేయ‌గా; బొగ్గు, కోక్‌, బ్రిక్వెట్స్ సైతం 13 శాతం త‌గ్గుద‌ల‌తో దిగుమ‌తుల‌ను నెమ్మ‌దించేలా చేశాయి.

ఏప్రిల్-జూన్ మ‌ధ్య వాణిజ్య లోటును 19.23 బిలియ‌న్ డాల‌ర్లుగా అంచ‌నా వేయ‌గా, ఇది గ‌తేడాది ఉన్న 32.225 బిలియ‌న్ డాల‌ర్ల కంటే చాలా త‌క్కువ‌. సేవల‌ రంగ ఎగుమ‌తులు చూస్తే 13.46 బిలియ‌న్ డాల‌ర్లుగా ఉంటూ 4.28 శాతం వృద్దిని క‌న‌బ‌రిచాయి. అదే స‌మ‌యంలో సేవా రంగ దిగుమ‌తులు 10.29 శాతం పెరుగుద‌ల‌తో 7.92 బిలియ‌న్ డాల‌ర్లుగా ఉన్నాయి.