మార్చి నెలాఖరుతో ఈ ఆర్ధిక సంవత్సరం ముగుస్తుంది. నిజానికి ఆదాయపు పన్ను భారాన్ని కాస్త తగ్గించుకోవాలన్నా, దానికి తగ్గట్టు ఆదా చెయ్యాలన్నా ఆర్ధిక సంవత్సరం మొదటి నుంచే చెయ్యాలి.

నెలవారీ జీతంపై ఆధాపడిన ఉద్యోగులైనా, నికర ఆదాయంపై ఆధారపడే వృత్తి నిపుణులైనా అప్పటికప్పుడు నగదు తేవాలంటే కష్టం కాబట్టి, ఏడాది ప్రథమార్ధం నుంచే పన్ను ఆదా ప్లానింగ్ చేస్తే సరి. పన్ను ఆదా కోసం ఏమిమి చేయాలో చూద్దాం.

పన్ను భారాన్ని గణనీయంగా తగ్గించు కోవాలంటే తాము పని చేస్తున్న కంపెనీకి కన్సల్టెంట్‌గా మారితే బాగుంటుందని నిపుణులు భావిస్తున్నారు. తద్వారా ఉద్యోగానికి అనుసంధానం అయిన వ్యయాలన్నింటికీ బిజినెస్‌ లేదా ప్రొఫెషన్‌ హెడ్‌ కింద మినహాయింపులు క్లెయిమ్‌ చేసుకోవచ్చు.

ముఖ్యంగా టెలిఫోన్‌ బిల్లులు, ట్రావెల్‌, ఎంటర్‌టైన్‌మెంట్‌, స్టేషనరీ లాంటివన్నీ ఇందులోకి వస్తాయి. ఇలాంటి ఖర్చులు ఏడాదికి 15 లక్షల రూపాయలు దాటితే మాత్రం వాటన్నింటికీ పుస్తక రూపంలో నిర్వహణ, ఆడిట్‌ తప్పనిసరిగా చేయించుకోవాలి. ఇక ఆదాయం పది లక్షలు దాటితే కన్సల్టెంట్లు సర్వీస్‌ టాక్స్‌ చెల్లించాల్సి ఉంటుంది. అయితే స్వల్పకాలంలో లభించే పన్ను ప్రయోజనాల కోసం దీర్ఘకాలిక ప్రయోజనాలు వదులుకోవడం మంచి పద్ధతి కాదు.