హైదరాబాద్: పౌల్ట్రీ పరిశ్రమకు వ్యవసాయ హోదా ఇచ్చే అంశాన్ని పరిశీలిస్తామని తెలంగాణ ముఖ్యమంత్రి కె చంద్రశేఖర్ రావు చెప్పారు. పౌల్ట్రీ పరిశ్రమల యజమానుల సంఘం అధ్యక్షుడు రంజిత్ రెడ్డి నాయకత్వంలో పలువురు ప్రతినిధులు ఆదివారం ముఖ్యమంత్రి కెసిఆర్‌ను అధికారిక నివాసంలో కలిశారు.

పౌల్ట్రీ పరిశ్రమను వ్యవసాయ రంగం మాదిరిగానే గుర్తించాలని, అన్ని రకాల ప్రోత్సాహకాలు అందించాలని కోరారు. ముఖ్యంగా విద్యుత్ సబ్సిడీలు, మొక్కొజన్న సబ్సిడీలు ఇవ్వాలని కోరారు. దీనికి ముఖ్యమంత్రి సానుకూలంగా స్పందించారు.

తెలంగాణలో దాదాపు 25వేల మందికి పైగా కోళ్ల పరిశ్రమ నడుపుతున్నట్లు తమ వద్ద సమాచారం వున్నట్లు సిఎం చెప్పారు. కోళ్ల పరిశ్రమ యజమానుల కోరికను సానుభూతితో పరిశీలిస్తానని చెప్పారు. కోళ్ల పరిశ్రమ తెలంగాణ పునర్నిర్మాణంలో ఎలా భాగస్వాములను చేయాలనే విషయంపై సముచిత నిర్ణయం తీసుకొంటామన్నారు.

ముఖ్యమంత్రి కెసిఆర్‌తో సమావేశం తర్వాత కోళ్ల పరిశ్రమల యజమానులు మీడియాతో మాట్లాడుతూ.. సమావేశం సంతృప్తినిచ్చిందని తెలిపారు. 30ఏళ్లుగా ప్రభుత్వానికి తమ సమస్యలు విన్నవించుకొంటున్నా ఏ ముఖ్యమంత్రి కూడా సానుకూలంగా స్పందించలేదని అన్నారు. తమ సమస్యలను కెసిఆర్ అర్థం చేసుకున్నారని చెప్పారు. ఈ సమావేశంలో పాల్గొన్న ఆర్థిక మంత్రి ఈటెల రాజేందర్ కూడా కోళ్ల పరిశ్రమ స్థితి గతులపై సిఎం కెసిఆర్‌తో చర్చించారు.