న్యూఢిల్లీ: దేశం మొత్తాన్ని ఒక ఊపుఊపిన 2జీ టెలికాం కుంభకోణం కేసులో విచారణ నిమిత్తం రిలయన్స్ గ్రూప్ ఛైర్మన్ అనిల్ అంబానీ సతీమణి టీనా అంబానీ ఈరోజు(శుక్రవారం) న్యూఢిల్లీలోని ప్రత్యేక కోర్టుకి వచ్చారు. 2జీ కుంభకోణం కేసు సీబీఐ ప్రత్యేక కోర్టు జడ్జి ఓపీ సైనీ నేతృత్వంలో విచారణ జరుగుతుంది. దీంతో 2జీ కుంభకోణం కేసులో సాక్షిగా టీనా అంబానీ కోర్టుకి హాజరయ్యారు. జులై 19న అనిల్ అంబానీ, టీనాలకు కోర్టు నుండి సమన్లు జారీ అవ్వడంతో.. ఈ కేసు విచారణ నిమిత్తం అనిల్ అంబానీ నిన్న కోర్టు ఎదుట హాజరైన విషయం తెలిసిందే.

ఇక వివరాల్లోకి వెళితే స్వాన్ టెలికం అనేది అనిల్ అంబానీ గ్రూపులోని బినామీ కంపెనీఅని ప్రాసిక్యూషన్ వాదిస్తుంది. ఈ కంపెనీకి అసలు టెలికం స్పెక్ట్రం గానీ, లైసెన్సు గానీ పొందే అర్హత లేదని ప్రాసిక్యూషన్ వాదించగా, ఈ విషయాన్ని అంబానీ తరఫు డిఫెన్స్ న్యాయవాదులు తీవ్రంగా ఖండించారు. అసలు ప్రాసిక్యూషన్ సాక్షులుగా అనిల్ అంబానీ, ఆయన భార్య టీనా అంబానీలను పిలవడాన్ని రిలయన్స్ టెలికం కంపెనీ బుధవారం సవాలుచేయగా, కోర్టు దాన్ని తిరస్కరించి జూలై 19న అనిల్ అంబానీ, టీనాలకు కోర్టు సమన్లు జారీ చేసింది.

కోర్టులో స్వాన్ టెలికం కంపెనీ గురించి తెలుసా అని ప్రాసిక్యూషన్ తరుపు న్యాయవాదులు ప్రశ్నించగా... స్వాన్ టెలికం కంపెనీ అనేది ఒకటుందని గానీ, దాని గురించి గానీ తనకు ఏమీ తెలియదని అనిల్ అంబానీ కోర్టుకు తెలిపారు. స్వాన్ టెలికం కంపెనీ 2008వ సంవత్సరంలో టెలికం స్పెక్ట్రం లైసెన్సుని పొందింది. ఐతే టెలికం రంగం గురించి చర్చించడానికి పలుమార్లు టెలికం శాఖ మంత్రులు దివంగత ప్రమోద్ మహాజన్, ఎ.రాజా, కపిల్ సిబల్ తదితరులను పలుమార్లు కలిశానని చెప్పారు.

వన్ఇండియా మనీ తెలుగు