మసాచుసెట్స్‌లోని కేంబ్రిడ్జిలో జరిగిన ఒక కార్యక్రమంలో అమెరికా ఫెడరల్ రిజర్వ్ చైర్మన్ బెన్‌బెర్నాంకీ మాట్లాడుతూ సహాయక ప్యాకేజీలపై మాటమార్చారు. ఆర్థిక వ్యవస్థ మరింత పుంజుకునే దాకా సహాయక ప్యాకేజీలను కొనసాగించాల్సిన అవసరం ఉందని తాజాగా స్పష్టం చేశారు. ఇప్పటికీ ఆశించిన స్థాయిలో ఉద్యోగాల కల్పన జరగడంలేదని, ద్రవ్యోల్బణం కూడా అనుకున్న స్దాయికి చేరడం లేదని బెర్నాంకీ చెప్పారు. దీనితో పాటు వడ్డీ రేట్లను ప్రస్తుతం ఉన్న స్దాయిలోనే కొనసాగిస్తున్నట్లు తెలిపారు.

వడ్డీ రేట్లను పెంచబోమంటూ అమెరికా ఫెడరల్ రిజర్వ్ ఛైర్మన్ బెర్నాంకీ చెప్పడంతో ప్రపంచ మార్కెట్లు ఒక్కసారిగా ఊపందుకున్నాయి. అమెరికా ఆర్దిక వ్యవస్దకు పటిష్టంగా ఉండేందుకు గాను మరికొంతకాలంపాటు నామమాత్ర స్దాయిలోమే రేట్లను కొనసాగించనున్నట్లు అమెరికా కేంద్ర బ్యాంక్ ప్రకటించిన విషయం తెలిసిందే. దీంతో ఆసియా సహా యూరప్‌లోని పలు స్టాక్ మార్కెట్లు కొనుగోళ్లతో కళకళలాడాయి. దీంతో బాంబే స్టాక్ ఎక్సేంజ్ 163 పాయింట్లు లాభపడుతూ ఈరోజు 19,839 వద్ద ట్రేడ్ అవుతుంది. అదే విధంగా నిప్టీ కూడా గరిష్టంగా 25 పాయింట్ల వరకూ లాభ పడుతూ 5,960 వద్ద ట్రేడ్ అవుతుంది. సెంటిమెంట్ సానుకూలంగా మారడంతో.. నిన్న ఒక్కరోజు లిస్టెడ్ కంపెనీల మార్కెట్ విలువకు రూ. లక్ష కోట్లు జమ అయింది. దీంతో మొత్తం మార్కెట్ క్యాప్ దాదాపు రూ. 65 లక్షల కోట్లకు చేరింది.

గత కొన్ని వారాలుగా అమెరికా వ్యవస్ద పుంజుకుంటున్న తరుణంలో ప్రపంచ వ్యాప్తంగా పెట్టుబడిదారులు ఆందోళనకు చెందారు. ప్రపంచ ఆర్దిక వ్యవస్దకు పెద్ద దిక్కుగా పని చేసే అమెరికా ఆర్దిక వ్యవస్ద పుంజుకోవండ సంతోషించాల్సిన విషయం. ఆర్థిక వ్యవస్థ పుంజుకుంటే సహాయక ప్యాకేజీలను నిలిపివేయడంతోపాటు, వడ్డీరేట్లను పెంచే అవకాశాలున్నాయంటూ బెర్నాంకీ ఇటీవలే వెల్లడించారు. దీంతో అటు పసిడితోపాటు, ఇటు స్టాక్ మార్కెట్లలో అమ్మకాలు పెరుగుతూ వచ్చాయి. సహాయక ప్యాకేజీలను కొనసాగించే సంకేతాలను ఇవ్వడం ద్వారా బెర్నాంకీ ప్రపంచవ్యాప్తంగా ఇన్వెస్టర్లకు ప్రోత్సాహాన్నిచ్చారని విశ్లేషకులు పేర్కొన్నారు. మందగమనంలో ఉన్న ఆర్దిక వ్యవస్దకు ఊపనిచ్చేందుకు అమెరికా కేంద్ర బ్యాంక్ సహాయక ప్యాకేజీలను అమలు చేస్తున్న విషయం తెలిసిందే.

వన్ఇండియా మనీ తెలుగు